`பேடா சுவைக்கு நாக்கு அடிமை' 50 ஆண்டுகளாக ஆற்காட்டை இனிக்க வைக்கும் 'மக்கன் பேடா'- தீபாவளி ஸ்பெஷல்!

தீபாவளி ஸ்பெஷல் | ஆற்காடு

ஆற்காடு என்றாலே... பலருக்கும் முதலில் நினைவுக்கு வருவது அதன் வரலாறும், பாரம்பர்யமும்தான். பல ஆண்டுகளைக் கடந்து நிற்கும் இந்த ஊருக்கு, உணவிலும் ஒரு தனி அடையாளம் இருக்கிறது. “ஆற்காட்டின் ஸ்பெஷல் உணவு என்ன?” என்று யாரிடம் கேட்டாலும், பெரும்பாலானோரின் பதில் ஒரே மாதிரியாக இருக்கும்... “மக்கன் பேடா!”

ஆற்காடு பல்வேறு உணவு வகைகளுக்குப் பெயர் பெற்றிருந்தாலும், அதன் இனிப்பு அடையாளமாகத் தனித்து நிற்பது மக்கன் பேடா. ஆற்காடு நவாப் காலத்து சமையல் மரபுடன் தொடர்புடையதாகக் கூறப்படும் இந்த இனிப்பு, பல தலைமுறைகளாக மக்களின் விருப்பத்தைப் பெற்று வருகிறது. பார்ப்பதற்கு பெரிய அளவிலான குலோப் ஜாமூன் போல இருந்தாலும், சுவையிலும் தயாரிப்பு முறையிலும் தனக்கென ஒரு தனி இடத்தைப் பிடித்துள்ளது மக்கன் பேடா.

இந்த பாரம்பர்ய சுவையை, கடந்த 50 ஆண்டுகளுக்கும் மேலாக மக்களிடம் கொண்டு சேர்த்து வருகிறது ஆற்காடு சேர்மன் ஸ்வீட்ஸ் அண்ட் பேக்கரி. பல்வேறு இனிப்பு வகைகள் தயாரிக்கப்பட்டாலும், அந்தக் கடையின் தனித்துவமான அடையாளமாக இருப்பது மக்கன் பேடாதான்.

மக்கன் பேடா தயாராகும் விதத்தையும், அதன் பின்னால் இருக்கும் உழைப்பையும் கடையின் உரிமையாளர் நமக்கு நேரடியாகக் காட்டினார்.

முதலில், மக்கன் பேடாவுக்கான மாவு நறுமணம் மிக்க நெய் சேர்த்து பக்குவமாகப் பிசையப்படுகிறது. நெய்யின் மணமும், மாவின் மென்மையும் ஒன்றாக கலந்து, சரியான பதத்துக்கு கொண்டு வரப்படுகிறது. பின்னர் அந்த மாவு சம அளவிலான உருண்டைகளாகப் பிரிக்கப்படுகிறது.

அதன் உள்ளே முந்திரி, பாதாம், பிஸ்தா, உலர் திராட்சை உள்ளிட்ட உலர் பழங்கள் வைத்து, மாவின் ஓரங்கள் மூடப்பட்டு அழகாக உருண்டை வடிவில் பிடிக்கப்படுகிறது. பின்னர் இந்த உருண்டைகள் மக்கன் பேடாவின் வடிவத்தைப் பெறுகின்றன.

அதன்பிறகு, அடுப்பில் வைக்கப்பட்ட கடாயில் எண்ணெய் மிதமான சூட்டுக்கு கொண்டு வரப்படுகிறது. சரியான வெப்பநிலையை அடைந்ததும், தயாரித்து வைத்திருக்கும் மக்கன் பேடாக்கள் எண்ணெயில் மெதுவாக இறக்கப்படுகின்றன. சீரான சூட்டில் வெந்து கொண்டிருக்கும் அந்த பேடாக்கள், கொஞ்சம் கொஞ்சமாக நிறம் மாறி அழகான பிரவுனிஷ் நிறத்தைப் பெறுகின்றன.

வெளிப்புறத்தில் மொறுமொறுப்பு என்று இல்லாமல், முழுவதுமாக மென்மையான தன்மையுடன் இருக்கும் இந்த மக்கன் பேடா, வாயில் வைத்த உடனே கரைந்து போகும் அளவுக்கு பால், நெய் மற்றும் இனிப்பின் சுவையைத் தருகிறது. இதுவே இதன் தனிச்சிறப்பு.

இதுகுறித்து கடையின் உரிமையாளர் கூறும்போது, “கிட்டத்தட்ட 50 ஆண்டுகளுக்கும் மேலாக இந்த பாரம்பர்ய சுவையைத் தொடர்ந்து மக்களுக்கு வழங்கி வருகிறோம். தற்போது இரண்டாவது தலைமுறையாக இந்தப் பணியைத் தொடர்வது எங்களுக்கு மிகவும் பெருமையாக இருக்கிறது” என்றார்.

தீபாவளி என்றாலே புத்தாடை, இனிப்பு, பட்டாசு என கொண்டாட்டப் பட்டியல் நீளும். அந்தப் பட்டியலில் ஆற்காடு மக்களின் மனதில் தவறாமல் இடம்பெறுவது ஆற்காடு ஸ்பெஷல் மக்கன் பேடா.

ஆற்காடு மட்டுமல்லாமல், ஆற்காட்டைச் சுற்றியுள்ள வேலூர், ராணிப்பேட்டை, திருப்பத்தூர், மேல்விஷாரம், வாலாஜா, காட்பாடி, திருவண்ணாமலை உள்ளிட்ட பல்வேறு பகுதிகளைச் சேர்ந்த மக்களும் தீபாவளி காலங்களில் இந்த இனிப்பை விரும்பி வாங்கிச் செல்கின்றனர். பாரம்பர்யமாக மக்கன் பேடாவை வாங்கி ரசிக்கும் பலரின் இனிப்பு பட்டியலில், இது தவிர்க்க முடியாத இடத்தைப் பிடித்துள்ளது.

ஓர் ஊரின் சுவை என்பது வெறும் உணவு மட்டுமல்ல... அது அந்த ஊரின் வரலாற்றையும், மக்களின் நினைவுகளையும் சுமந்து நிற்கும் அடையாளம். தமிழ்நாட்டின் பல பகுதிகளில் இருக்கும் பாரம்பர்

ய இனிப்புகளைப் போலவே, ஆற்காட்டின் மக்கன் பேடாவும் ஒரு தலைமுறையிலிருந்து அடுத்த தலைமுறைக்கு பயணிக்கும் இனிப்பு அடையாளமாகத் தொடர்ந்து நிற்கிறது.