இரவிலும் சூரிய ஒளி: இந்திய நிறுவனத்துடன் அமெரிக்க ஸ்டார்ட்அப் ஒப்பந்தம் - வரவேற்பும் கவலையும்!

இரவு நேரத்திலும் சூரிய ஒளியைப் பெற முடியுமா?

அமெரிக்காவின் கலிபோர்னியாவைச் சேர்ந்த Reflect Orbital நிறுவனம், விண்வெளியில் பெரிய பிரதிபலிப்புக் கண்ணாடிகள் பொருத்தப்பட்ட செயற்கைக்கோள்களை அனுப்பி, சூரிய ஒளியைத் தேர்ந்தெடுக்கப்பட்ட பூமிப் பகுதிகளுக்குத் திருப்பத் திட்டமிட்டுள்ளது. இதற்காக இந்தியாவின் ஹைதராபாத்தைச் சேர்ந்த Skyroot Aerospace நிறுவனத்துடன் இரண்டு ஏவுதல் ஒப்பந்தங்களில் கையெழுத்திட்டுள்ளது.

எப்படி வேலை செய்யும்?

செயற்கைக்கோளில் இருக்கும் பெரிய கண்ணாடிகள் சூரிய ஒளியைப் பிடித்து, பூமியில் குறிப்பிட்ட இடத்தை நோக்கிப் பிரதிபலிக்கும். நிறுவனத்தின் திட்டப்படி, சுமார் ஐந்து கிலோமீட்டர் பரப்பளவில் ஒளியைச் செலுத்தவும், அதன் பிரகாசத்தை மாற்றவும், தேவையெனில் அணைக்கவும் முடியும். ஆனால் இந்தச் சேவை இன்னும் செயல்பாட்டுக்கு வரவில்லை தொழில்நுட்பம் நிஜச் சூழலில் எவ்வளவு பயனளிக்கும் என்பது சோதனைகளுக்குப் பிறகே தெரியவரும்.

ஏன் இந்த முயற்சி?

இரவில் சூரிய மின்சக்தி உற்பத்தியை நீட்டிப்பது, பேரிடர் பகுதிகளில் தேடுதல்–மீட்புப் பணிகளுக்கு வெளிச்சம் தருவது, தொலைதூரத் தொழிற்பகுதிகளில் வேலைகளைத் தொடர உதவுவது போன்ற பயன்பாடுகளை நிறுவனம் முன்வைக்கிறது. இதன் மூலம் இரவிலும் சூரிய ஒளியை ஒரு சேவையாக வழங்கி வருவாய் ஈட்டுவதே அதன் வணிக நோக்கம்.

இந்திய நிறுவனத்தின் பங்கு என்ன?

Skyroot, தனது Vikram ராக்கெட்டுகள் மூலம் இந்தச் செயற்கைக்கோள்களை விண்ணில் செலுத்தும். முதல் ஏவுதல் Vikram-1 ராக்கெட்டிலும், இரண்டாவது இன்னும் உருவாக்கப்பட்டுவரும் Vikram-1U வாகனத்திலும் நடைபெறத் திட்டமிடப்பட்டுள்ளது. ஏவுதலுக்கான தேதிகளும் ஒப்பந்தத் தொகையும் வெளியிடப்படவில்லை.

வரவேற்பும் கவலைகளும்

இந்த யோசனை பேரிடர் மீட்பு, சூரிய மின்சக்தி போன்ற துறைகளுக்கு உதவலாம் என்றாலும், இரவின் இயற்கையான இருளை மாற்றுவது குறித்து வானியலாளர்களும் சுற்றுச்சூழல் ஆர்வலர்களும் கவலை தெரிவிக்கின்றனர்.

பிரதிபலிக்கும் ஒளி இலக்கு இடத்தைத் தாண்டிப் பரவக்கூடும்; அது வனவிலங்குகள், மனிதர்களின் தூக்கச் சுழற்சி, வானியல் ஆய்வுகள் ஆகியவற்றைப் பாதிக்கலாம். எனவே, இது வரவேற்கப்படும் புதுமையா அல்லது கட்டுப்பாடுகள் தேவைப்படும் முயற்சியா என்பது அதன் சோதனை முடிவுகளையும் ஒழுங்குமுறை அனுமதிகளையும் பொறுத்தது.!