KGF Yash: "நான் உனக்குத் துணையாக இருக்கிறேன்" - புற்றுநோய் பாதிக்கப்பட்ட ரசிகருடன் பேசிய நடிகர் யஷ்!

கன்னட திரையுலகின் முன்னணி நட்சத்திரமும், `கே.ஜி.எஃப்' (KGF) படத்தின் மூலம் உலக அளவில் பிரபலமானவருமான நடிகர் யஷ், புற்றுநோயால் பாதிக்கப்பட்டு சிகிச்சை பெற்று வரும் தனது தீவிர ரசிகர் ஒருவருடன் வீடியோ காலில் பேசி, அவருக்குத் தைரியம் அளித்த நிகழ்வு நெகிழ்ச்சியை ஏற்படுத்தியுள்ளது.

வீடியோ காலில் பேசிய ரசிகரின் பெயர் சுனில். இவர் சிவமொக்கா மாவட்டத்தைச் சேர்ந்தவர், யஷ்ஷின் ரசிகர் மன்றத்தின் மாவட்டத் தலைவராக நீண்ட காலமாகச் செயல்பட்டு வருபவர். குடல் புற்றுநோயால் (Rectal Cancer) பாதிக்கப்பட்டு மருத்துவமனையில் தீவிர சிகிச்சை பெற்று வருகிறார்.

தனது தீவிர ரசிகர் ஒருவர் இவ்வளவு கடுமையான நோயால் பாதிக்கப்பட்டுள்ளார் என்பதை அறிந்த நடிகர் யஷ், தனது படப்பிடிப்பு வேலைகளுக்கு (டாக்சிக், ராமாயணம்) இடையில் நேரத்தை ஒதுக்கி, வீடியோ கால் செய்தார்.

சுனிலின் உடல்நலம் குறித்து அக்கறையுடன் விசாரித்ததுடன், அவரது குடும்பத்தினருடனும் பேசி, அவர்களுக்கு மன உறுதி அளித்துள்ளார். சுனிலின் நீண்டகால அர்ப்பணிப்பையும், ரசிகர் மன்றப் பணிகளில் அவர் காட்டிய ஈடுபாட்டையும் அன்புடன் நினைவு கூர்ந்தார். "நான் உனக்குத் துணையாக இருக்கிறேன்" என்று உறுதியளித்து ஊக்கப்படுத்தினார்.

இந்த வீடியோ சமூக வலைதளங்களில் வைரலாகப் பரவியது. யஷ்ஷின் இந்த செயலைப் பாராட்டி, ரசிகர்கள் அவரை "ரியல் ஹீரோ" என்றும், "இதற்காகத்தான் அவரை அனைவரும் விரும்புகிறார்கள்" என்றும் சமூக வலைதளங்களில் நெகிழ்ச்சியுடன் பதிவிட்டு வருகின்றனர்.

பெரும் நட்சத்திரங்கள் பிஸியான ஷூட்டிங் கால அட்டவணையில் இருக்கும்போது, இத்தகைய செயல்களில் ஈடுபடுவது ரசிகர்களுக்கும், பொதுமக்களுக்கும் பெரிய உத்வேகத்தை அளிக்கும். யஷ் தனது ரசிகர்களை வெறும் ரசிகர்களாகப் பார்க்காமல், தனது இத்தனை ஆண்டுக்காலப் பயணத்தில் உடனிருப்பவர்களாகவும் கருதுகிறார்.

திரைப்படங்கள் ஒரு நடிகரை நட்சத்திரமாக்கலாம், ஆனால் இது போன்ற செயல்களே ஒரு நடிகர் என்பதையும் தாண்டி ரசிகர்களின் இதயங்களில் ஒரு நிரந்தரமான இடத்தில் அமர வைக்கும்.