'மனைவி கேட்ட ரூ.1 கோடி, மகனின் மருத்துவ செலவால் கடன்' - 43வது மாடியிலிருந்து குதித்த பொறியாளர்

டெல்லி அருகில் உள்ள குருகிராம் என்ற இடத்தில் வசித்து வந்தவர் சாம்பவ் ஜெயின் (28). சாப்ட்வேர் எஞ்சினியராக இவர் நொய்டாவில் உள்ள ஹோட்டல் ஒன்றில் அறை எடுத்து தங்கி இருந்தார்.

அந்த ஹோட்டலின் 43 வது மாடியில் இருந்து குதித்து தற்கொலை செய்து கொண்டார். முன்னதாக அவர் பால்கனியின் வெளியில் இருந்த கம்பெனியில் தொங்கியபடி காணப்பட்டார். அவர் தொங்கிக்கொண்டிருந்தபோது கையை விட்டுவிட்டார்.

இதனால் 43வது மாடியில் இருந்து கீழே விழுந்து இறந்து போனார். தற்கொலைக்கு முன்பு ஜெயின் வீடியோ ஒன்றைப் பதிவு செய்திருந்தார். அதில் மன அழுத்தம் காரணமாகவும், கடன் தொல்லையாலும் தற்கொலை செய்து கொள்வதாகவும், தனது இந்த முடிவுக்குத் தானே காரணம் என்றும், வேறு யாரும் காரணம் இல்லை என்றும் அதில் குறிப்பிட்டுள்ளார்.

ரூ.1 கோடி கேட்ட மனைவி

ஜெயின் உடலை மீட்டு பிரேதப் பரிசோதனைக்கு அனுப்பிவிட்டு இது குறித்து போலீஸார் வழக்குப் பதிவு செய்து விசாரித்து வந்தனர்.

இது குறித்து போலீஸ் அதிகாரி சும்னேஷ் குமார் கூறுகையில், ''குடும்பம் சூழ்நிலைகள், அவரது மகனின் உடல்நிலை, பெருகிவரும் கடன் மற்றும் திருமண தகராறு ஆகியவற்றால் அவர் மன உளைச்சலில் இருந்தார்'' என்று தெரிவித்தார்.

போலீஸார் இது குறித்து மேற்கொண்டு விசாரித்தபோது ஜெயினுக்கும் அவரது மனைவிக்கும் தகராறு இருந்து வந்துள்ளது.

அவரது மனைவி விவாகரத்து கேட்டு மனுத்தாக்கல் செய்துள்ளார். இதையடுத்து அவரது மனைவி ஒரு கோடி ரூபாய் கேட்டார். இறுதியில் இது குறித்து பேசி அதனை ரூ.15 லட்சமாகக் குறைத்தனர். அதில் முதல் தவணையாக ரூ.7.5 லட்சத்தை ஏற்கனவே ஜெயின் தனது மனைவிக்குக் கொடுத்து இருந்தார்.

மகனுக்கு ரூ.40 லட்சம் செலவு

அதோடு அவர்களுக்குக் கடந்த ஆண்டு மகன் பிறந்தான். ஆனால் அவன் குறை பிரசவத்தில் பிறந்ததால் அவனுக்கு இதுவரை ரூ.40 லட்சம் வரை செலவு செய்துள்ளார். மேலும் தொடர்ந்து செலவு செய்ய வேண்டியிருக்கிறது. இதற்காக அதிக அளவில் கடன் வாங்கி இருந்தார்.

மேலும் 140 கிலோ எடையுடன் ஜெயின் இருந்ததால் அதிக அளவில் உடல் நலப்பிரச்னையும் இருந்தது. இது போன்ற பல்வேறு பிரச்னைகளால் மன அழுத்தம் ஏற்பட்டு இந்த விபரீத முடிவை எடுத்ததாக போலீஸ் வட்டாரங்கள் தெரிவித்தன.

தற்கொலைக்கு முன்பு அவர் தனது தந்தையுடன் தொடர்பில் இருந்துள்ளார். அவர் தன்னால் இனி வாழமுடியாது என்றும் தற்கொலை செய்து கொள்ளப்போவதாகவும் கூறியுள்ளார்.