தாராபுரம்: முதல்வர் விஜய்க்கு மாட்டு வண்டி ஓட்டியவர் தேடப்படும் குற்றவாளியா? சர்ச்சை பின்னணி என்ன?

தாராபுரம் தொகுதி இடைத்தேர்தலில் த‌.வெ.க வேட்பாளராக போட்டியிட்டுள்ள சத்தியபாமாவை ஆதரித்து முதலமைச்சர் விஜய் தாராபுரத்தில் நேற்று ரோடு ஷோ நிகழ்ச்சியில் பங்கேற்றுள்ளார்.

வாக்காளர்களைக் கவரும் வகையில் மாட்டு வண்டியில் பயணித்தும் விவசாயிகளுடன் முருங்கைக்காய் பறித்தும் வாக்கு சேகரிப்பில் ஈடுபட்டுள்ளார். இந்த நிலையில், முதலமைச்சர் விஜய்யின் மாட்டு வண்டி பயணித்தின்போது அஷோக் என்ற நபர் அந்த மாட்டு வண்டியை ஓட்டியுள்ளார்.

அ.தி.மு.க-வைச் சேர்ந்த அஷோக், சத்தியபாமாவைப் பிரசாரம் செய்ய விடாமல் தடுத்தார் என்ற காரணத்திற்காக அவர் மீது வழக்குப்பதிவு செய்திருக்கிறது காவல்துறை. கைது நடவடிக்கையில் இருந்து காப்பாற்றுகிறோம்‌ என்கிற பெயரில் அவரை மிரட்டி த.வெ.க- வில் இணைத்துள்ளனர் என்ற குற்றச்சாட்டு எழுந்துள்ளது.

இது குறித்து தெரிவித்த அ‌.தி.மு.க திருப்பூர் புறநகர் மாவட்ட செயலாளர் செல்வகுமார், "பொட்டிக்காபாளையம் அஷோக் என்பவர் எங்கள் கட்சியில்தான் இருந்தார். சில தினங்களுக்கு முன்பு த.வெ.க வேட்பாளர் சத்தியபாமாவை தேர்தல் பிரசாரம் செய்ய விடாமல் தடுத்தார் என்ற காரணத்திற்காக அஷோக் உட்பட 7 பேர் மீது வழக்குப்பதிவு செய்யப்பட்டுள்ளது.

மற்ற அனைவரும் சிறையில் இருக்கிறார்கள். அஷோக்கைத் தேடி வருவதாக காவல்துறை கூறியிருந்தது. ஆனால், அஷோக்கை மட்டும் இரவோடு இரவாக மிரட்டி த.வெ.க-வில் இணைய வைத்திருக்கிறார்கள். அதோடு விடமால், முதலமைச்சருக்கு மாட்டு வண்டியை ஓட்ட வைத்திருக்கிறார்கள். அதற்கு ஆடியோ ஆதாரம் இருக்கிறது. கைது நடவடிக்கையில் இருந்து தப்பிக்க கட்சி மாறினாலும் அவர் தேடப்படும் குற்றவாளிதான்" என்றார்.