பெருந்துறை: நிர்வாணமாக காட்டுக்குள் கிடந்த செவிலியரின் உடல் - போலீஸ் விசாரணை!

ராமநாதபுரம் மாவட்டம் முதுகுளத்துார், பூங்குளம் பகுதியைச் சேர்ந்தவர் ரஞ்சித் இவரின் மனைவி உத்திரா. திருப்பூர் மாவட்டம் பல்லகவுண்டன்பாளையத்தில் வாடகை வீட்டில் வாழ்ந்து வந்துள்ளனர். ரஞ்சித் குமார் கட்டட வேலை செய்து வந்திருக்கிறார். உத்திரா பெருந்துறையில் உள்ள தனியார் மருத்துவமனை ஒன்றில் செவிலியராக அண்மையில் பணியில் சேர்ந்து வேலை செய்து வந்திருக்கிறார்.

இந்த நிலையில், கடந்த 14- ம் மாலை மனைவியை வீட்டிற்கு அழைத்துச் செல்ல மருத்துவமனைக்குச் சென்றிருக்கிறார் ரஞ்சித். அவர் ஏற்கனவே வீட்டிற்கு கிளம்பி விட்டதாக மருத்துவமனை தரப்பில் கூறியுள்ளனர். ஆனால், உத்திரா வீட்டிலும் இல்லை. செல்போனிலும் தொடர்பு கொள்ள முடியாத நிலையில், அதிர்ச்சியடைந்த ரஞ்சித் காவல்துறையில் புகார் அளித்துள்ளார்.

இது குறித்து வழக்குப்பதிவு செய்து தேடி வந்த நிலையில்,‌ பெருந்துறை விஜயமங்கலம் டோல்கேட் அருகில் உள்ள பொன் கைலாஷ் நகர் செல்லும் வழியில் ஒரு காட்டில், இளம்பெண் சடலம் நிர்வாண நிலையில் கிடப்பதாக, பெருந்துறை காவல்துறையினருக்கு நேற்று தகவல் கிடைத்துள்ளது. அங்கு சென்ற காவல்துறையினர் அழுகிய நிலையில் கிடந்த சடலத்தை கைப்பற்றியுள்ளனர். அருகில் கிடந்த உடைகள் மற்றும் காலணிகளை வைத்து உத்திராவின் உடல் என்பதை உறுதி செய்துள்ளனர்.

பின்னணி குறித்து தெரிவித்த பெருந்துறை காவல்துறையினர், " வழக்கமாக கணவர் தான் மாலையில் வீட்டிற்கு பைக்கில் அழைத்துச் சென்றிருக்கிறார். அன்றைய தினம் அவர் முன்கூட்டியே கிளம்பியதாக சொல்கிறார்கள். வழியில் அவரை கடத்திச் சென்று கொலை செய்யப்பட்டுள்ளாரா அல்லது வேறு ஏதாவது காரணம் உள்ளதா என்பது குறித்து தீவிர விசாரணை மேற்கொண்டு வருகிறோம். விரைவில் உண்மை தெரியவரும்" என்றனர்.