ஜெம் வீரமணி வழக்கு: மேலும் ஒரு சிறுமி புகார்; வீரமணியின் மேலாளர் கைது!

சென்னை பெருநகர காவல்துறையின் விபச்சார தடுப்பு பிரிவில் Pendrive -ஒன்றை கொடுத்த என்.ஜி.ஓ அமைப்பு ஒன்று, ஜெம் வீரமணி குறித்து பரபரப்பு புகாரைக் கொடுத்தது. அதன்பேரில் போக்சோ உள்ளிட்ட பிரிவுகளின் கீழ் வழக்குப்பதிவு செய்த போலீஸார், சிறுமிகளிடம் பாலியல் குற்றங்களில் ஈடுபட்டதாகக் கூறப்படும் பிரபல கிரானைட் தொழிலதிபர் வீரமணி, அவருக்கு உதவிய சாந்தி, சாந்தியின் கணவர் மகேந்திரசிம்ஹன் ஆகியோரை 29.08.2026-ம் தேதி கைது செய்தனர். மேலும் இது தொடர்பான மற்றொரு வீடியோவை வைத்திருந்தும் காவல்துறைக்கு தகவல் தெரிவிக்காத வீரமணியிடம் வேலைப் பார்த்த முன்னாள் ஊழியர் கணேசன் என்பவரை 22.09.2026-ம் தேதி போலீஸார் கைது செய்தனர். அதைத் தொடர்ந்து சிறுமிகளை அழைத்து வந்த குற்றச்சாட்டில் வீரமணியின் டிரைவர்கள் லாசர், பார்த்திபன், பாபு ஆகியோர் 05.10.2026-ம் தேதி கைது செய்யப்பட்டனர்.

ஜெம் வீரமணி வழக்கை சரியாக விசாரிக்காத குற்றச்சாட்டு எழுந்தது. இதில் சில ஐ.பி.எஸ் அதிகாரிகள், போலீஸார் மீது குற்றம் சுமத்தப்பட்டது. அதனால், டி.ஜி.பி மகேஷ்குமார் அகர்வால், ஜெம் வீரமணி வழக்கை விசாரிக்க சிறப்பு புலனாய்வு குழு ஒன்றை அமைத்து உத்தரவிட்டார். இந்த சிறப்பு புலனாய்வு குழு வீரமணி வழக்கை விசாரித்து வருகிறது. இந்தக் குழுவிடம் ஜெம் வீரமணி மீது அடுத்தடுத்து புகார்கள் வந்த வண்ணம் உள்ளன. இதுவரை ஜெம் வீரமணி மீது ஆறு வழக்குகள் பதிவு செய்யப்பட்டு விசாரணை நடந்து வருகிறது. இந்த நிலையில் பாதிக்கப்பட்ட சிறுமி ஒருவர் சிறப்பு புலனாய்வு குழுவிடம் புகார் ஒன்றைக் கொடுத்தார். அதன் அடிப்படையில் 18.10.2026-ம் தேதி ஜெம் வீரமணி மீது ஏழாவதாக மேலும் ஒரு வழக்கை சிறப்பு புலனாய்வு குழுவினர் பதிவு செய்து விசாரணை நடத்திவருகின்றனர். விசாரணையில், இந்தச் சம்பவம் வீரமணியின் பெண் தோழியான சாந்தி வீட்டில் நடந்திருப்பது தெரியவந்துள்ளது. அதனால் ஜெம் வீரமணியை போலீஸார் இரண்டு நாள்கள் போலீஸ் காவலில் எடுத்து விசாரித்தனர். விசாரணையில் கிடைத்த தகவலின் அடிப்படையில் ஜெம் வீரமணியின், லாயட்ஸ் ரோடு வீடு, கானத்தூரில் உள்ள அவரது பண்ணை வீடு மற்றும் அவரது Stone அலுவலகம் ஆகியவற்றில் தீவிர சோதனை நடத்தப்பட்டு சில முக்கிய ஆதாரங்கள் கைப்பற்றப்பட்டுள்ளன. இந்த நிலையில்தான் வீரமணிக்கு உதவிய ஜெம் கிரானைட் நிறுவனத்தின் மேனஜர் சக்திவேலை போலீஸார் 18.10.2026-ம் தேதி கைது செய்தனர். சக்திவேல் என்பவர் மூலம் வீரமணி சட்ட நடவடிக்கைகளில் இருந்து தப்பிக்க பணப்பரிமாற்றம் நடந்திருப்பது தெரியவந்திருக்கிறது. அதுதொடர்பாக அவரிடம் போலீஸார் துருவி துருவி விசாரித்து வருகிறார்கள். இந்த வழக்கை பொறுத்தவரை இதுவரை பதினொரு சிறுமிகள், வீரமணி மீது புகாரளித்திருக்கிறார்கள். அதனால் சிறப்பு புலனாய்வு குழுவினர் வீரமணி வழக்கை தீவிரமாக விசாரித்து வருகிறார்கள்.