`கரீனா கபூர் அணிந்த 200 ஆண்டு பழமையான மரகத நெக்லஸ்' - திருக்குர்ஆன் வசனம் இடம்பெற்றதால் சர்ச்சை!

Nov 12, 2026 - 10:00

`கரீனா கபூர் அணிந்த 200 ஆண்டு பழமையான மரகத நெக்லஸ்' - திருக்குர்ஆன் வசனம் இடம்பெற்றதால் சர்ச்சை!

பாலிவுட் நடிகை கரீனா கபூர் கான் தீபாவளி பண்டிகையையொட்டி அணிந்திருந்த ஆபரணம் ஒன்று, மத உணர்வுகளைப் புண்படுத்துவதாகக் கூறி பெரும் சர்ச்சையில் சிக்கியுள்ளது. தீபாவளி கொண்டாட்டத்தின் போது, பாரம்பரிய உடையணிந்த புகைப்படங்களை கரீனா கபூர் தனது சமூக வலைதளப் பக்கத்தில் பகிர்ந்திருந்தார். ஆடை வடிவமைப்பாளர் புனித் பலானா வடிவமைத்த வெள்ளி நிற கஃப்தான் உடை மற்றும் தலைப்பாகையுடன் கரீனா இருக்கும் புகைப்படங்களை ரியா கபூர் பகிர்ந்திருந்தார். அதில், போபால் நவாபிற்குச் சொந்தமான 200 ஆண்டுகள் பழமையான 'கல்கி' மற்றும் போபால் பேகத்திற்குச் சொந்தமான 30 காரட் மரகத நெக்லஸ் ஆகியவற்றை கரீனா அணிந்திருந்தார்.

View this post on Instagram

இவை கரீனாவின் கணவர் சைஃப் அலிகானின் பாட்டியும், போபால் நவாபின் மகளுமான சஜிதா சுல்தான் வழியாக வந்த அரச குடும்பத்துப் பாரம்பரிய நகைகள் என்பது குறிப்பிடத்தக்கது. அந்தப் புகைப்படங்களில் கரீனா அணிந்திருந்த போபால் அரச குடும்பத்து பதக்கத்தில், திருக்குர்ஆனின் புனித வசனமான 'ஆயத்துல் குர்ஸி' (Ayat-ul-Kursi) பொறிக்கப்பட்டிருப்பதாக இணையத்தில் விவாதங்கள் எழுந்தன.

திருக்குர்ஆனின் புனித வசனங்களை வெறும் ஃபேஷன் அடையாளமாகப் பயன்படுத்துவதும், இத்தகைய ஆடைகளுடன் அதை அணிவதும் மத உணர்வுகளைப் புண்படுத்தும் செயல் என மத்தியப் பிரதேச காங்கிரஸ் செய்தித் தொடர்பாளர் அப்பாஸ் ஹபீஸ் கடும் ஆட்சேபனை தெரிவித்துள்ளார். மேலும், சமூக வலைதளங்களில் பதிவிடப்பட்டுள்ள அந்தப் புகைப்படங்களை உடனடியாக நீக்க வேண்டும் என்றும், கரீனா கபூர் பகிரங்கமாக நிபந்தனையற்ற மன்னிப்பு கேட்க வேண்டும் என்றும் அவர் வலியுறுத்தியுள்ளார்.

இந்த நடவடிக்கையை ஒரு இஸ்லாமியராகத் தனது தனிப்பட்ட முறையில் எடுத்துள்ளதாகவும், இதற்கும் காங்கிரஸ் கட்சிக்கும் எந்தத் தொடர்பும் இல்லை என்றும் அப்பாஸ் ஹபீஸ் தெளிவுபடுத்தியுள்ளார். குறிப்பிட்ட காலக்கெடுவுக்குள் புகைப்படங்களை நீக்கி மன்னிப்பு கேட்கத் தவறினால், காவல்துறை அல்லது நீதிமன்றம் மூலமாக அடுத்தகட்ட சட்ட நடவடிக்கை எடுக்கப்படும் எனவும் அவர் எச்சரித்துள்ளார். இந்தச் சர்ச்சை குறித்து கரீனா கபூர் தரப்பிலிருந்தோ அல்லது ரியா கபூர் தரப்பிலிருந்தோ இதுவரை எந்த அதிகாரப்பூர்வ விளக்கமும் அளிக்கப்படவில்லை என்பது குறிப்பிடதக்கது.