நகராட்சி நிர்வாகத் துறையில் மோசடி: KN நேரு வீட்டில் இரண்டாவது முறையாக லஞ்ச ஒழிப்புத் துறை ரெய்டு

திமுக முன்னாள் அமைச்சர் கே.என். நேருவுக்குச் சொந்தமான இடங்களில் இன்று (அக்டோபர் 29) லஞ்ச ஒழிப்புத் துறையினர் சோதனை மேற்கொண்டு வருகின்றனர்.

கடந்த திமுக ஆட்சியின்போது, நகராட்சி நிர்வாகத் துறையின் கீழ் உதவிப் பொறியாளர்கள், இளநிலைப் பொறியாளர்கள் உள்ளிட்ட அரசுப் பணியிட நியமனங்களில் ரூ.634 கோடி வரை லஞ்ச முறைகேடு நடந்ததாகப் புகார் எழுந்தது.

இந்தப் புகாரின் அடிப்படையில்தான் இன்று நேரு வீட்டில் சோதனை நடைபெற்று வருகிறது. இதற்கு முன்பு, கடந்த செப்டம்பர் 5-ம் தேதி, இந்தப் புகாரின் பெயரில் முதற்கட்ட சோதனை நடத்தப்பட்டது.

கடந்த அக்டோபர் 26-ம் தேதி, தனியார் பள்ளி நிர்வாகிகளிடம் அரசு அனுமதி பெற்றுத் தருவதாகக் கூறிப் பண மோசடி செய்த வழக்கில் திமுக முன்னாள் அமைச்சர் அன்பில் மகேஸ் பொய்யாமொழியை சென்னை மத்திய குற்றப்பிரிவு போலீசார் கைது செய்துள்ளனர். அவர் தற்போது சிறையில் உள்ளார்.

இப்போது நேரு வீட்டில் சோதனை நடைபெற்று வருகிறது. நேரு, அன்பில் மகேஸ் இருவருமே திருச்சியைச் சேர்ந்தவர்கள் ஆவார்கள்.

அடுத்து திருச்சி கிழக்கு இடைத்தேர்தல் வர உள்ளதால், அதைக் கணக்கில் வைத்துச் சோதனைகள், கைது ஆகியவற்றைத் த.வெ.க. அரசு நடத்துகிறதா என்கிற பேச்சும் அரசியல் வட்டாரத்தில் அடிபடுகின்றன.