Asian Games: 44 ஆண்டுகளுக்குப் பிறகு மீண்டும் தங்கம்… வரலாறு படைத்த இந்திய மகளிர் ஹாக்கி அணி!

44 ஆண்டுகளாகக் காத்திருந்த அந்தத் தங்கம்… இப்போது இந்தியாவின் கைகளில்! 2026 ஆசிய விளையாட்டுப் போட்டியின் மகளிர் ஹாக்கி இறுதிப்போட்டியில் சீனாவை 1-0 என்ற கோல் கணக்கில் வீழ்த்தி, இந்திய அணி தங்கப் பதக்கத்தை வென்று வரலாறு படைத்துள்ளது.

போட்டி தொடங்கியதிலிருந்தே இரு அணிகளும் விடாமல் மோதிய நிலையில், 10-வது நிமிடத்தில் இந்தியாவுக்குக் கிடைத்த வாய்ப்பை லால்ரெம்சியாமி சரியாகப் பயன்படுத்தினார். அவரது அசத்தலான ஷாட் சீனாவின் கோல் வலையைத் துளைக்க, இந்தியா 1-0 என முன்னிலை பெற்றது. அதன்பிறகு அந்த ஒரு கோலைக் காப்பாற்றுவதற்கான போராட்டமாகவே போட்டி மாறியது.

பதிலடி கொடுக்க சீனா தொடர்ந்து தாக்குதல் நடத்த, இந்திய வீராங்கனைகள் தடுப்பாட்டத்தில் அசராமல் நின்றனர். முக்கியமான தருணத்தில் சீனாவுக்கு கிடைத்த பெனால்டி ஸ்ட்ரோக்கையும் கோல் கீப்பர் சவிதா புனியா தடுத்து நிறுத்தினார். இறுதி விசில் வரை இந்தியாவின் முன்னிலை மாறாமல் இருந்தது.

இதன்மூலம் 1982-ம் ஆண்டுக்குப் பிறகு 44 ஆண்டுகள் கழித்து இந்திய மகளிர் ஹாக்கி அணி ஆசிய விளையாட்டில் மீண்டும் தங்கம் வென்றுள்ளது. 1998 மற்றும் 2018-ல் இறுதிப்போட்டிக்குச் சென்றும் வெள்ளியுடன் திரும்பிய இந்திய அணிக்கு, இந்த முறை தங்கம் வசமாகியுள்ளது. அதுமட்டுமல்லாமல், இந்த வெற்றியின் மூலம் 2028 லாஸ் ஏஞ்சல்ஸ் ஒலிம்பிக் போட்டிக்கும் இந்திய அணி நேரடியாகத் தகுதி பெற்றுள்ளது.

இதற்கிடையே, இந்திய ஆடவர் ஹாக்கி அணியும் தங்கத்தை நோக்கி முன்னேறியுள்ளது. பாகிஸ்தானை 4-3 என்ற பரபரப்பான ஆட்டத்தில் வீழ்த்தி இறுதிப்போட்டிக்குச் சென்றுள்ள இந்திய அணி, அக்டோபர் 3-ம் தேதி மலேசியாவை எதிர்கொள்கிறது. மகளிர் அணி தங்கத்தை வசமாக்கிய நிலையில், ஆடவர் அணியும் நாளை தங்கத்துக்காக களமிறங்குகிறது.