மும்பை: கடற்கரையோர வீடுகளில் ஆர்வம் - கோடிகளை முதலீடு செய்யும் பாலிவுட் பிரபலங்கள்!

மும்பை பாந்த்ரா பகுதியில் பாலிவுட் பிரபலங்கள் அதிக அளவில் வசித்து வருகின்றனர். பாந்த்ரா கடற்கரை பகுதியான பேண்ட்ஸ்டாண்ட், பாலி ஹில், ஒர்லி, ஜூகு மற்றும் வெர்சோவா பகுதிகளில் பாலிவுட் பிரபலங்கள் கோடிகளை செலவு செய்து சொத்துகளை வாங்கி குவித்து வருகின்றனர். அரபிக்கடலின் தடையற்ற காட்சிகளையும், அதன் காற்றையும் அனுபவிக்கும் நோக்கில் அவர்கள் இந்த அளவுக்கு கோடிகளை செலவு செய்து வருகின்றனர். பாந்த்ரா மேற்கு பகுதி பாலிவுட் தொழில்துறையினரின் மிகவும் விருப்பமான இடமாக உள்ளது. அங்குள்ள பேண்ட்ஸ்டாண்ட் மற்றும் கார்ட்டர் ரோடு, கடல் பகுதியை கண்டுகளிக்கும் வகையில் இருக்கின்றன.

அதே நேரத்தில் பாலி ஹில் பசுமையான மற்றும் மிகவும் சுதந்திரமான மற்றும் ஏற்கெனவே பிரபலங்கள் நிறைந்த பகுதியாக இருக்கிறது. நடிகர் ஷாருக் கான் ஆரம்பத்தில் இருந்தே கடற்கரையோரம் வசித்து வருகிறார். அவரது மன்னத் பங்களா கடற்கரையோரம் இருக்கிறது.

அவரது வீட்டில் இருந்து வெளியில் வந்தாலே கடல்தான் இருக்கிறது. அதிகமானோர் கடற்கரைக்கு வருவது போல் வந்து நடிகர் ஷாருக் கான் வீட்டையும் பார்த்து செல்வது வழக்கம்.

ஷாருக் கான் வீட்டிற்கு அருகில் நடிகர் ரன்வீர் சிங் அடுக்குமாடி கட்டடத்தில் 4 மாடிகளை ஒன்றாக இணைத்த வீட்டை வாங்கி இருக்கிறார். அந்த வீட்டின் மதிப்பு ரூ.119 கோடியாகும். இந்த வீடு 16 முதல் 19 வது தளங்கள் முழுவதும் பரவியுள்ளது. இது 11,266 சதுர அடி கார்பெட் பகுதி, 1,300 சதுர அடி மொட்டை மாடி மற்றும் ஒரு தனியார் லிஃப்ட் ஆகியவற்றை வழங்குகிறது. தீபிகா படுகோனின் நிறுவனம் அதன் அருகில் உள்ள அடுக்குமாடிக் குடியிருப்பை 17.8 கோடி ரூபாய்க்கு வாங்கியது. இதுவும் கடற்கரையோரம் நடிகர் ஷாருக் கான் வீட்டிற்கு மிகவும் அருகில் இருக்கிறது.

இதே போன்று ரன்வீர் சிங் வீட்டிற்கு அருகில் செயின்ட் மார்ட்டின் சாலையில் உள்ள நூற்றாண்டு

பங்களாவை நடிகர் ஜான் ஆபிரகாம் ரூ.84 கோடிக்கு வாங்கினார். இந்த சொத்து சுமார் 11,000 சதுர அடி பரப்பளவில் உள்ளது

இதற்கு முன்பு கார்ரோடு பகுதியில் உள்ள மற்றொரு பங்களாவை இவர் ரூ.70.83 கோடிக்கு வாங்கினார்.
பாந்த்ரா பாலி ஹில் பகுதியில் நடிகர் ரன்பீர் கபூர் மற்றும் ஆலியா பட் ஆகியோரின் ஆறு மாடி கிருஷ்ண ராஜ் பங்களாவும் உள்ளது. 250 கோடி மதிப்பிலான இந்தக் குடும்ப மாளிகையில் செங்குத்துத் தோட்டங்கள், நீச்சல் குளம் மற்றும் அவர்களது மகள் ராஹாவுக்கான முழுத் தளமும் உள்ளதாகக் கூறப்படுகிறது. அலியாவுக்கு ஜூகு வில் ரூ.13.11 கோடி மதிப்புள்ள அடுக்குமாடி குடியிருப்பும் உள்ளது. பாலிவுட் நடிகை கிருதி சனோன் பாலிஹில் பகுதியில் 6,636 சதுர அடியில் ரூ.78.2 கோடி பங்களாவை வாங்கி இருக்கிறார். இது கடற்கரையோரம் இருக்கிறது.

பாந்த்ரா-ஒர்லி கடல் இணைப்பு பாலம் மற்றும் கடற்கரை சாலை ஆகியவை மூலம் தெற்கு மும்பைக்கு எளிதில் செல்ல வாய்ப்பு ஏற்பட்டுள்ளது. இதனால் இங்கு வீடுகளின் சராசரி விலைகள் ஒரு சதுர அடிக்கு ரூ. 75,000 ஆகும். அதே சமயம் பிரீமியமாக கடலை எதிர்கொள்ளும் அடுக்குமாடி கட்டடத்தில் உள்ள வீடுகள் சதுர அடிக்கு ரூ. 1 லட்சம் முதல் ரூ. 1.5 லட்சம் வரை விற்பனையாகிறது.

இதே போன்று ஜூகு பகுதியும் கடற்கரையையொட்டி இருப்பதால் அங்கு சதுர அடி ரூ. 57,600க்கு விற்பனையாகிறது. வெர்சோவா பகுதியில் 2,644 சதுர அடி அடுக்குமாடி குடியிருப்பை நடிகர் விராட் கோலியும், அவரது மனைவி அனுஷ்காவும் ரூ. 18.29 கோடிக்கு வாங்கியுள்ளனர். இங்கு நடிகை தபு ரூ.10 கோடிக்கு அதே கட்டடத்தில் ஒரு வீட்டை வாங்கியுள்ளார்.