வேறொருவருடன் நெருக்கம்; விஷம் கொடுத்து மாணவியை கொன்று `ஸ்கெட்ச்' போட்ட பேராசிரியர் சிக்கியது எப்படி?

தெலங்கானாவில் உள்ள நஸ்பூர் என்ற இடத்தில் இருக்கும் பால்டெக்னிக்கில் பேராசிரியராக இருப்பவர் நவீன் குமார். இவர் பணியாற்றிய பாலிடெக்னிக்கில் தந்திரா (20) என்ற மாணவி படித்து வந்தார். அவரும் நவீன் குமாரும் நெருங்கி பழகினர். பாலிடெக்னிக் முடித்த மாணவி இன்ஜினீயரிங் படிப்பதற்காக ஐதராபாத்துக்குச் சென்றார். அங்கு படித்தபோது ரவிகுமார் என்பவருடன் தந்திராவுக்கு தொடர்பு ஏற்பட்டது. இதனால் நவீன் குமாருடனான தொடர்பு தந்திராவுக்கு குறைந்தது.

அத்தோடு ரவிகுமாருடன் தந்திராவுக்கு தொடர்பு ஏற்பட்டது குறித்து நவீன் குமாருக்குத் தெரிய வந்தது. ரவிகுமாருடன் தந்திரா நெருங்கி பழகுவது நவீன் குமாரால் பொறுத்துக்கொள்ள முடியவில்லை. இதையடுத்து அவர்கள் இருவர் மீதும் நவீன் குமாருக்கு கடும் கோபம் ஏற்பட்டடு, தந்திராவை பழிவாங்க முடிவு செய்தார்.

நஸ்பூரில் தந்திரா தனது வீட்டிற்கு சாலையில் நடந்து சென்று கொண்டிருந்தார். அவரை நவீன் குமார் காரில் வலுக்கட்டாயமாக அழைத்துச் சென்றார். பின்னர் ரவிகுமார் தன்னை பாலியல் வன்கொடுமை செய்து கட்டாயப்படுத்தி விஷம் குடிக்க வைத்ததாக தந்திராவை கட்டாயப்படுத்தி கடிதம் எழுத வைத்தார். பின்னர் தந்திராவிற்கு கட்டாயப்படுத்தி விஷம் கொடுத்து குடிக்க வைத்தார்.

அதன் பிறகு தந்திராவை மருத்துவமனைக்கு கொண்டு செல்வதை தாமதப்படுத்தி, தந்திராவின் போனை பயன்படுத்தி அவரது தந்தைக்கு இது குறித்து தகவல் கொடுத்தார். தந்திரா தற்கொலைக்கு முயன்றதாக நவீன் குமார் தெரிவித்தார். தந்திராவை அவரது தந்தை மருத்துவமனையில் சேர்த்தார். ஆனால் சிகிச்சை பலனலிக்காமல் அடுத்த நாள் உயிரிழந்தார். போலீஸார் இது குறித்து வழக்கு பதிவு செய்து விசாரித்து வந்தனர். கண்காணிப்பு கேமரா மற்றும் போன் பதிவுகளை ஆய்வுசெய்து நவீன் குமார் மற்றும் ரவிகுமாரை கைது செய்தனர். இருவரிடமும் விசாரித்தபோது உண்மையான குற்றவாளி நவீன் குமார் என்று தெரிய வந்தது. ரவிகுமாரை இதில் சிக்கவைக்க நவீன் குமார் முயன்றதும் தெரிய வந்தது.