"LIK படத்தின் வசூலை இன்னும் என்னால் ஏற்றுக்கொள்ள முடியவில்லை" - விக்னேஷ் சிவன் கவலை

பிரதீப் ரங்கநாதன் நடிப்பில் விக்னேஷ் சிவன் இயக்கத்தில் 'லவ் இன்சூரன்ஸ் கம்பெனி' திரைப்படம் கடந்த ஏப்ரல் மாதம் திரையரங்குகளில் வெளியானது.

இந்நிலையில், படத்திற்கு இணையத்தில் பரவிய விமர்சனங்கள் படத்திற்குக் கிடைக்க வேண்டிய வரவேற்பைத் தடுத்திருக்கிறது எனக் குறிப்பிட்டு, இயக்குநர் விக்னேஷ் சிவன் அவருடைய இன்ஸ்டாகிராம் பக்கத்தின் ஸ்டோரியில் பகிர்ந்திருக்கிறார்.

பார்வையாளர் ஒருவர், ''படத்தைப் பற்றி வந்த எதிர்மறை விமர்சனங்கள் படத்தைப் பார்க்க வேண்டும் என்கிற என் ஆர்வத்தைக் குறைத்தன.

ஆனால், இப்போது படத்தின் ஓடிடியில் பார்த்தேன். எனக்கு மிகவும் பிடித்திருக்கிறது'' எனக் குறிப்பிட்டு விக்னேஷ் சிவனுக்கு மெசேஜ் செய்திருக்கிறார். இந்த மெசேஜுக்குப் பிறகு இப்பதிவை அவர் பதிவிட்டிருக்கிறார்.

அந்தப் பதிவில் விக்னேஷ் சிவன், "இணையத்தில் பரவிய கடுமையான எதிர்மறை விமர்சனங்கள் காரணமாக, தியேட்டர்களில் இந்தத் திரைப்படத்தைப் பார்க்க முடியாமல் போய்விட்டது என்று பலர் எனக்கு மெசேஜ் செய்திருந்தனர்.

சில திரைப்படங்கள் எதிர்மறை விமர்சனங்களை எதிர்கொண்டு தப்பிப் பிழைத்து விடுகின்றன. சில படங்கள் அப்படித் தப்பிப்பதில்லை. தங்களுடைய புத்திசாலித்தனத்தை காட்டுவதற்காக எழுதப்படும் விமர்சனங்கள், ஒரு படத்தை விவாதிப்பதையும் தாண்டி, பார்வையாளர்கள் அந்தப் படத்திற்கு ஒரு வாய்ப்பு கொடுப்பதையே தடுத்து விடுகின்றன.

அத்தோடு, லட்சியத்தோடு இருக்கும் இயக்குநர்களின் கனவுகளையும் சிதைத்து விடுகின்றன. 'லவ் இன்சூரன்ஸ் கம்பெனி' திரைப்படத்தின் வசூல் முடிவை என்னால் இன்னும் முழுமையாக ஏற்றுக்கொள்ள முடியவில்லை.

வித்தியாசமாகவும், முழுமையாகவும், அசலாகவும் இருக்க முயன்ற ஒரு நேர்மையான தமிழ்த் திரைப்படம் அது. பார்வையாளர்களிடமிருந்து இன்னும் கொஞ்சம் நல்ல வரவேற்பைப் பெற்றிருக்கத் தகுதியானது என்று நான் உணர்கிறேன்.

இதுபோன்ற ஒரு திரைப்படத்தை உருவாக்குவதற்குப் பின்னால் இருக்கும் போராட்டங்களைப் பலர் பார்ப்பதில்லை. இதை எடுப்பது கடினமாக இருந்தது. அதை ரிலீஸ் செய்வது இன்னும் கடினமாக இருந்தது.

அத்தனை சவால்களையும் தாண்டி வந்த பிறகு, இது இப்படி முடிவடைவதைப் பார்ப்பது வேதனையாக இருக்கிறது. உலக சினிமா வரலாற்றில் முதலில் வெளியானபோது ஏற்றுக்கொள்ளப்படாமல், பின்னாளில் கொண்டாடப்பட்ட எத்தனையோ சிறந்த திரைப்படங்கள் இருக்கின்றன என்ற எண்ணம் மட்டுமே இப்போது எனக்குச் சற்று ஆறுதல் அளிக்கிறது.

நேற்று, ஒரு இயக்குநர் என்னிடம் ஒரு விஷயத்தைக் கூறினார். அது என் மனதில் அப்படியே பதிந்துவிட்டது. அவர், "ஒரு படத்தின் வெற்றி, அதற்குள் இருப்பதைவிட, வெளியேதான் அதிகமாக இருக்கிறது" என்றார்.

அதாவது, ஒரு திரைப்படத்தின் வெற்றி என்பது பெரும்பாலும் அதற்குள் என்ன இருக்கிறது என்பதை விட, அதைச் சுற்றி என்ன நடக்கிறது என்பதைக் கொண்டே தீர்மானிக்கப்படுகிறது" எனக் குறிப்பிட்டிருக்கிறார்.