நெல் உலர்த்தும் நவீன இயந்திரங்கள் அமைக்க வேண்டியது காலத்தின் கட்டாயம்!

ஆண்டுதோறும் குறுவை மற்றும் சம்பா நெல் அறுவடை நேரங்களில் ஏற்படும் பருவம் தவறிய திடீர் மழையினால், விவசாயிகள் கடும் துயரங்களைச் சந்தித்து வருகிறார்கள். அரசு நேரடி நெல் கொள்முதல் நிலையங்களில் நெல்லைப் பாதுகாக்கப் போதுமான கட்டமைப்பு வசதிகள் இல்லாததால், நெல்மணிகள் மழையில் நனைந்து முளைத்து வீணாகி, விவசாயிகளுக்குப் பெரும் பொருளாதார இழப்பு ஏற்படுகிறது. இந்த சோகக் கதை, நீடித்துக் கொண்டே இருக்கிறது.

நெல்லைக் கொள்முதல் செய்ய, மத்திய அரசு அனுமதிக்கக்கூடிய ஈரப்பத உச்சவரம்புக் கட்டுப்பாடு என்பது பெரும் தலைவலியாக உள்ளது. ஒவ்வொரு பருவத்தின்போதும் ஈரப்பத உச்சவரம்பை உயர்த்தும்படி மத்திய, மாநில அரசுகளை வலியுறுத்தி விவசாயிகள் போராட வேண்டிய அவசியமும் ஏற்படுகிறது.

இவ்வாறான பாதிப்புகளை நிரந்தரமாகத் தடுப்பதற்குத் தமிழ்நாடு அரசின் நிதியிலிருந்து அல்லது நபார்டு (NABARD) நிதி உதவியுடன், அனைத்து நேரடி நெல் கொள்முதல் நிலையங்களிலும் நெல் உலர்த்தும் நவீன இயந்திரங்கள் மற்றும் நெல் உலர்த்தும் உயரமான களங்கள் அமைக்க வேண்டும். அதற்கு, நம் ஆட்சியாளர்கள் உடனடியாக நடவடிக்கை மேற்கொள்ள வேண்டும். மிகவும் அவசியமான இந்த அடிப்படை வசதிகளை அனைத்து நெல் கொள்முதல் நிலையங்களிலும் முழு வீச்சில் தமிழக அரசு செயல்படுத்த வேண்டும்.

ஆட்சியாளர்கள் உடனே வழக்கம்போல், ‘தமிழக அரசின் கஜானாவில் போதுமான பணம் இல்லை’ எனப் புலம்பக் கூடாது. ஒருவேளை, உண்மையாகவே தமிழக அரசிடம் இதற்கு நிதி இல்லையென்றால், புதிய தலைமைச் செயலகம் கட்டுவதற்காக ஒதுக்கீடு செய்யவுள்ள சுமார் 1,200 கோடி ரூபாய் நிதியைத் திருப்பிவிட்டு, நெல் உலர்த்தும் நவீன இயந்திரங்கள் வாங்குவதற்கும், நெல் உலர்த்தும் களங்கள் அமைத்திடவும் பயன்படுத்த வேண்டும்.

இந்த விஷயத்தில் தமிழக அரசு கொஞ்சமும் அலட்சியம் காட்டாமல், அக்கறையுடன் நடந்துகொள்ள வேண்டியது காலத்தின் கட்டாயம்!

- ஆசிரியர்