பாரதிராஜா: `தமிழ் சினிமாவின் முகத்தை மாற்றிய மேதை... சினிமாவில் புரட்சிகள் செய்த இயக்குநர் இமயம்!'

தமிழ் சினிமா வரலாற்றை `பாரதிராஜாவுக்கு முன்', 'பாரதிராஜாவுக்குப் பின்' என்று தாராளமாகப் பிரிக்கலாம். 1970-களின் இறுதியில், திரையரங்குகளில் நிலவிய செயற்கையான நாடகத்தன்மைக்கு முற்றுப்புள்ளி வைத்து, மண் மணம் வீசும் கிராமங்களுக்குள் நுழைந்தவர் `இயக்குநர் இமயம்' பாரதிராஜா.

ஒரு படைப்பாளி எப்படித் தன் மண்ணையும் மக்களையும் நேசித்து, அதை உலகத்தரம் வாய்ந்த சினிமாவாக மாற்ற முடியும் என்பதற்கு அவரே சிறந்த உதாரணம். எப்படி தமிழ் சினிமாவில் இருந்த பல எழுதப்படாத விதிகளை உடைத்து எறிந்து அவர் ஒரு தனித்துவமான இயக்குநராக மாறினார்...

ஸ்டுடியோக்களிலிருந்து கிராமத்திற்கு...

அதுவரை தமிழ் திரைப்படங்கள் ஏவிஎம், விஜயவாஹினி போன்ற பெரிய ஸ்டுடியோக்களுக்குள் செட் போடப்பட்டுதான் எடுக்கப்பட்டன. மரங்கள், வீடுகள், வானம் என எல்லாமே செயற்கையாக இருக்கும். கேமராவை முதன்முதலில் ஸ்டுடியோக்களில் இருந்து வெளியே தூக்கிக்கொண்டு கிராமங்களுக்குச் சென்றது பாரதிராஜாவின் மிகப்பெரிய புரட்சி. புழுதி பறக்கும் சாலைகள், வயல்வெளிகள், கிராமத்துச் சாவடிகள் என தமிழ் சினிமாவை இயற்கையோடு இணைத்தார்.

மேக்கப் இல்லாத யதார்த்தம்

சினிமா என்றாலே அதிக மேக்கப், பளபளப்பான உடைகள் என்றிருந்த நிலையை மாற்றினார். நிஜத்தில் மக்கள் எப்படி இருக்கிறார்களோ, அப்படியே திரையிலும் காட்டினார். அழுக்கு ஆடைகள், கலைந்த தலைமுடி என கதாபாத்திரங்களை அவற்றின் இயல்பிலேயே காட்டினார்.

புதுமுகங்களின் வருகை

பெரிய நட்சத்திரங்களை வைத்து மட்டுமே படம் எடுக்க முடியும் என்ற மாயையை உடைத்தார். சாதாரண தோற்றம் கொண்ட பல புதுமுகங்களை அறிமுகப்படுத்தி, அவர்களை மாபெரும் நட்சத்திரங்களாக மாற்றிய பெருமை இவருக்கு உண்டு. ராதிகா, ரேவதி, ராதா, கார்த்திக், சுஹாசினி, ரேகா என அவர் அறிமுகப்படுத்திய நட்சத்திரங்களின் பட்டியல் மிக நீளமானது.

நாடகத்தனமற்ற நடிப்பும் வசனங்களும்

நீளமான வசனங்கள், நாடகத்தனமான உச்சரிப்பு, ஓவர் ஆக்டிங் என்று இருந்த தமிழ் சினிமாவை மாற்றி, மக்கள் இயல்பில் எப்படிப் பேசுவார்களோ அதே வட்டார வழக்கையும், யதார்த்தமான நடிப்பையும் திரையில் கொண்டு வந்தார்.

சமூகப் பிரச்னைகளைத் தைரியமாகப் பேசியது

கிராமத்து அழகை மட்டும் அவர் காட்டவில்லை; அங்குள்ள இருண்ட பக்கங்களையும் தைரியமாகப் பதிவு செய்தார். சாதிய ஏற்றத்தாழ்வுகள் மற்றும் தீண்டாமை (வேதம் புதிது), பெண் சிசுக்கொலை (கருத்தம்மா), உறவுச் சிக்கல்கள் (முதல் மரியாதை) என வழக்கமான சினிமா ஃபார்முலாக்களில் இருந்து விலகி, அழுத்தமான கதைகளைக் கையாண்டார்.

"என் இனிய தமிழ் மக்களே..." - இயக்குநருக்கான அடையாளம்

ஒரு படத்திற்கு ஹீரோவை விட 'இயக்குநரே' முக்கியம், இயக்குநர்தான் படத்தின் கேப்டன் என்ற பிம்பத்தை ஆழமாகப் பதிவு செய்தார். திரையில் தோன்றாமலேயே, "என் இனிய தமிழ் மக்களே..." என்ற தனது ஒற்றைக் குரலின் மூலம் ரசிகர்களைத் தியேட்டருக்கு வரவழைத்த முதல் சூப்பர் ஸ்டார் இயக்குநர் அவர்தான்.

இப்படி, தமிழ் சினிமாவின் முகத்தை 'செயற்கையான அலங்காரத்திலிருந்து, உண்மையான யதார்த்தத்திற்கு' மாற்றியதே பாரதிராஜா செய்த மாபெரும் புரட்சி.

அவர் வெறும் இயக்குநராக மட்டும் நின்றுவிடாமல், தமிழ் சினிமாவின் பார்வையை உலகத் தரத்திற்கு உயர்த்திய ஒரு முன்னோடியாகத் திகழ்கிறார். தொழில்நுட்ப வளர்ச்சிகள் எத்தனையோ வந்தாலும், இன்றும் பாரதிராஜாவின் படங்கள் பேசப்படக் காரணம், அவர் காட்டிய யதார்த்தம் காலத்தைக் கடந்து நிற்கக்கூடியது என்பதால்தான்.

தமிழ் சினிமா இருக்கும் வரை பாரதிராஜாவின் தடங்கள் அழியாது.!