ChatGPT-யிடம் ஒரு கேள்வி கேட்டா, ஒரு பாட்டில் தண்ணீர் காலி! - மலைக்கவைக்கும் AI-யின் இருண்ட பக்கம்

நாம் அன்றாடம் பயன்படுத்தும் ChatGPT போன்ற AI கருவிகள் எவ்வளவு எளிமையாக, எவ்வளவு விரைவாக நமக்கு பதில்களைத் தருகின்றன! ஒரு மின்னஞ்சல் எழுதச் சொன்னால் சில நொடிகளில் தந்துவிடுகிறது. ஆனால், அந்த ஒவ்வொரு நொடிக்கும் பின்னால், நாம் நினைத்துப் பார்க்க முடியாத அளவுக்கு ஒரு விலை கொடுக்கப்படுகிறது.

அதுதான் 'தண்ணீர்'.

ஆம், நீங்கள் ChatGPT-யிடம் 100 வார்த்தைகளில் ஒரு மின்னஞ்சல் எழுதச் சொன்னால், கிட்டத்தட்ட 519 மில்லி லிட்டர் தண்ணீர் செலவாகிறது. அதாவது, ஒரு முழு தண்ணீர் பாட்டில் காலி!

நம்ப முடியவில்லையா?

இது வெறும் கற்பனை இல்லை. கலிஃபோர்னியா ரிவர்சைடு பல்கலைக்கழகத்தின் ஆராய்ச்சியாளர்கள் வெளியிட்ட ஒரு ஆய்வறிக்கையில்தான் இந்த அதிர்ச்சிகரமான தகவல் வெளியாகியுள்ளது. AI சேவைகளை வழங்கும் பிரம்மாண்டமான டேட்டா சென்டர்களை குளிர்விப்பதற்காகப் பயன்படுத்தப்படும் நேரடித் தண்ணீர் மற்றும் அந்த டேட்டா சென்டர்களுக்குத் தேவையான மின்சாரத்தை உற்பத்தி செய்யப் பயன்படும் மறைமுகத் தண்ணீர் என இரண்டையும் கணக்கிலெடுத்தே இந்த முடிவுக்கு வந்துள்ளனர்.

எதற்காக இவ்வளவு தண்ணீர்? AI-யின் தாகம் தீராதது ஏன்?

AI டேட்டா சென்டர்கள் என்பவை சாதாரண கணினிகள் அல்ல. அவை பல்லாயிரக்கணக்கான உயர்-செயல்திறன் கொண்ட கிராபிக்ஸ் பிராசசிங் யூனிட்களை (GPUs) கொண்டவை. இந்த சிப்கள் தொடர்ந்து இயங்கும்போது, கற்பனை செய்ய முடியாத அளவுக்கு வெப்பத்தை வெளியிடுகின்றன. இந்த வெப்பத்தைக் கட்டுப்படுத்தவில்லை என்றால், மொத்த சிஸ்டமும் செயலிழந்துவிடும். இதைத் தவிர்க்கப் பயன்படுத்தப்படும் மிக பொதுவான முறைதான் 'evaporative cooling' எனப்படும் ஆவியாக்கி குளிர்விக்கும் தொழில்நுட்பம்.

இந்த முறையில், தண்ணீர் பெரிய குழாய்கள் மூலம் டேட்டா சென்டர்களுக்குள் செலுத்தப்பட்டு, சர்வர்களின் வெப்பத்தை உறிஞ்சிக்கொள்கிறது. பின்னர், அந்த வெப்பமான நீரின் ஒரு பகுதி நீராவியாக வளிமண்டலத்தில் வெளியிடப்படுகிறது. இப்படி உள்ளே கொண்டுவரப்படும் நீரில் சுமார் 80% ஆவியாகி நிரந்தரமாக இழக்கப்படுகிறது.

மீதமுள்ள நீர், அதிக வெப்பத்துடனும் சில ரசாயன எச்சங்களுடனும் மீண்டும் சுழற்சிக்கு அனுப்பப்படுகிறது. ஒரே ஒரு பெரிய AI டேட்டா சென்டர் ஒரு நாளில் பயன்படுத்தும் தண்ணீரின் அளவு, 10,000 பேர் கொண்ட ஒரு சிறு நகரத்தின் குடிநீர், சுகாதாரம் மற்றும் விவசாயத் தேவைகளை விட அதிகம் என்பதுதான் இங்கே நாம் கவனிக்க வேண்டிய விஷயம்.

பெரிய நிறுவனங்களின் நிலை என்ன? கணக்குகள் மலைக்க வைக்கின்றன!

உலகின் முன்னணி தொழில்நுட்ப நிறுவனங்களான கூகுள், மைக்ரோசாஃப்ட் போன்றவை தங்களின் தண்ணீர் பயன்பாடு குறித்த அறிக்கைகளை வெளியிடத் தொடங்கியுள்ளன. அந்த எண்கள் நம்மை இன்னும் கவலைகொள்ளச் செய்கின்றன.

கூகுளின் 2024 சுற்றுச்சூழல் அறிக்கையின்படி, இந்நிறுவனம் ஒரே ஆண்டில் சுமார் 8.1 பில்லியன் கேலன் தண்ணீரைப்(1 கேலன் = 3.785 லிட்டர்) பயன்படுத்தியுள்ளது, இதில் 95% டேட்டா சென்டர்களுக்காக மட்டுமே. கடந்த மூன்று ஆண்டுகளில் மட்டும் கூகுளின் தண்ணீர் பயன்பாடு கிட்டத்தட்ட இருமடங்காகியுள்ளது. இதற்குக் காரணம் AI தொழில்நுட்பத்தின் அபரிமிதமான வளர்ச்சி என கூகுளே ஒப்புக்கொள்கிறது.

மைக்ரோசாஃப்ட்டின் கணக்கு இதைவிட மோசமாக இருக்கிறது. 2022-ல் இந்நிறுவனம் 1.7 பில்லியன் கேலன் தண்ணீரைப் பயன்படுத்தியது, இது முந்தைய ஆண்டை விட 34% அதிகம். குறிப்பாக, GPT-4 மாடலைப் பயிற்றுவிப்பதற்காக அயோவாவில் உள்ள ஒரு டேட்டா சென்டரில் மட்டும், ஜூலை 2022-ல் 11.5 மில்லியன் கேலன் தண்ணீரும், ஆகஸ்ட் மாதம் 13.4 மில்லியன் கேலன் தண்ணீரும் செலவிடப்பட்டுள்ளது. உலகின் மிகப்பெரிய கிளவுட் சேவையை வழங்கும் அமேசான், தனது மொத்த தண்ணீர் பயன்பாடு குறித்த தரவுகளை இன்னும் வெளியிடவே இல்லை என்பது கூடுதல் அதிர்ச்சி.

தண்ணீர் தட்டுப்பாடுள்ள பகுதிகளில் மையம் கொள்ளும் AI

இங்கே பிரச்சினை வெறும் தண்ணீரின் அளவு மட்டுமல்ல, அது எங்கிருந்து எடுக்கப்படுகிறது என்பதுதான். 2027-க்குள், உலகளாவிய AI தேவைகளுக்கான தண்ணீர் பயன்பாடு, பிரிட்டனின் மொத்த ஆண்டுத் தண்ணீர் பயன்பாட்டில் பாதியை எட்டும் என ஆய்வுகள் கூறுகின்றன. கொடுமை என்னவென்றால், இந்தத் தண்ணீர் பெரும்பாலும் ஏற்கனவே வறட்சியால் பாதிக்கப்பட்டிருக்கும் பகுதிகளில் இருந்துதான் உறிஞ்சப்படுகிறது.

மைக்ரோசாஃப்ட் தனது 2023 அறிக்கையில், தமது தண்ணீர் பயன்பாட்டில் 42% தண்ணீர் தட்டுப்பாடுள்ள பகுதிகளில் இருந்து எடுக்கப்படுவதாக ஒப்புக்கொண்டுள்ளது. சிலியில், 15 ஆண்டுகளாகத் தொடரும் வறட்சியைக் காரணம் காட்டி, கூகுளின் 200 மில்லியன் டாலர் டேட்டா சென்டர் திட்டத்திற்கு நீதிமன்றம் தடை விதித்தது. மெக்சிகோவில், நூற்றாண்டு காணாத வறட்சி நிலவும் பகுதியில், 32 புதிய டேட்டா சென்டர்கள் கட்டப்படவுள்ளன. இப்படி வறண்ட நிலங்களின் கடைசி சொட்டு நீரையும் இந்த AI தொழில்நுட்பம் உறிஞ்சிவிடுமோ என்ற அச்சம் உலகெங்கும் சூழலியல் ஆர்வலர்களிடையே எழுந்துள்ளது.

மறைக்கப்படும் உண்மைகள் மற்றும் பதிலளிக்கப்படாத கேள்விகள்

நிறுவனங்கள் வெளியிடும் புள்ளிவிவரங்கள் பனிமலையின் நுனி மட்டுமே. எடுக்கப்படும் தண்ணீரின் அளவு, அதில் ஆவியாகி இழக்கப்படும் தண்ணீரின் அளவு, மறைமுகமாக மின்சார உற்பத்திக்கு ஆகும் தண்ணீர் செலவு என பல முக்கியத் தகவல்களை நிறுவனங்கள் வெளியிடுவதில்லை. ஆய்வாளர்களின் கூற்றுப்படி, மறைமுகத் தண்ணீர் செலவு என்பது நேரடி செலவை விட 12 மடங்கு அதிகமாக இருக்கலாம் என்கிறார்கள்.

ஒருபுறம், காலநிலை மாற்றம், வறட்சி கணிப்பு, திறமையான நீர்ப்பாசனம் போன்ற உலகின் பெரிய பிரச்சினைகளுக்கு AI தீர்வு தரும் என நம்பப்படுகிறது. மறுபுறம், அந்த AI-ஐ இயக்குவதற்கே உலகின் நீர் ஆதாரங்கள் சுரண்டப்படுகின்றன. இந்த முரண்பட்ட பயணத்தில், தொழில்நுட்பத்தின் பலன்கள் அதன் சுற்றுச்சூழல் பாதிப்புகளை விட வேகமாக இருக்குமா என்பதுதான் நம் முன்னுள்ள மிகப்பெரிய கேள்வி.

நாம் கேட்கும் ஒவ்வொரு கேள்விக்கும் AI பதிலளிக்கும். ஆனால், அதன் தாகத்தைத் தீர்க்க இந்த பூமிக்கு நீர் எங்கிருந்து வரும் என்பதற்கு யாரிடமும் பதில் இல்லை.!