ஜெம் வீரமணி: `காவலில் வைத்து விசாரியுங்கள்..!'- போக்சோ வழக்கில் ஆஜர்படுத்திய போலீஸ்; கோர்ட் உத்தரவு!

ஜெம் நிறுவனர் வீரமணி வழக்கு, தேசிய அளவில் பெரும் அதிர்வலைகளை ஏற்படுத்தியிருக்கிறது. ஏற்கெனவே போக்சோ வழக்கில் கைதுசெய்யப்பட்டு நீதிமன்றக் காவல் விசாரணையில் இருக்கும் அவர்மீது, மற்றொரு புகாரின் அடிப்படையில் போக்சோ வழக்கு பதிவு செய்யப்பட்டிருக்கிறது. இந்த விவகாரத்தில் ஆளும், தவெக அரசும், எதிர்க்கட்சியான திமுக-வும் மாறி மாறி ஒருவர் மீது ஒருவர் குற்றம்சாட்டி வருகின்றன.

சுமார் 20 ஆண்டுகளுக்கும் மேலாக கல்விக்கு நிதி உதவி கேட்டு வரும் சிறுமிகளை வீரமணி பாலியல் வன்கொடுமை செய்ததாக தகவல் வெளியாகி அதிர்வலைகளை ஏற்படுத்தியது. இந்த வழக்கில் அவர் கைது செய்யப்பட்டதோடு அவருக்கு உடந்தையாக இருந்த உதவியாளர் சாந்தி, சாந்தியின் கணவர் மகேந்திர சிம்மன், உதவியாளர் கணேசன் ஆகியோரும் கைது செய்யப்பட்டுள்ளனர்.

வீரமணி மீது இதுவரை 15-க்கும் மேற்பட்ட பாதிக்கப்பட்ட பெண்கள் புகார் அளித்துள்ள நிலையில், காவல்துறை தரப்பில் பல்வேறு சட்டப் பிரிவுகளின் கீழ் 4 வழக்குகள் பதிவு செய்யப்பட்டிருக்கின்றன. இவ்வழக்கை விரைவாகவும் நடுநிலையாகவும் விசாரிக்க டிஜிபி மகேஷ் குமார் அகர்வால் உத்தரவின் பேரில், ஐ.ஜி பி.சி.தேன்மொழி தலைமையில் பெண் அதிகாரிகள் அடங்கிய சிறப்புப் புலனாய்வுக் குழு (SIT) அமைக்கப்பட்டிருக்கிறது. இந்த நிலையில், பாலியல் வழக்கில் கைதான ஜெம் வீரமணி, இன்று சென்னை உயர் நீதிமன்ற வளாகத்தில் உள்ள போக்சோ நீதிமன்றத்தில் ஆஜர்படுத்தப்பட்டார்.

இந்த வழக்கை விசாரித்து வரும் நீதிபதி பத்மா, ஜெம் வீரமணியை அக்டோபர் 21-ம் தேதிவரை நீதிமன்றக் காவலில் அடைத்து விசாரிக்க உத்தரவிட்டிருக்கிறார். முதல் வழக்கில் கைதாகி சிறையில் இருக்கும் அவரை இரண்டாவது வழக்கிலும் போலீஸார் கைதுசெய்தனர். இதற்கான ஆவணங்கள் சிறை அதிகாரிகளிடம் வழங்கப்பட்டுள்ளன. இதற்கிடையில், ஜெம் வீரமணியை மேலும் ஐந்து நாள்கள் நீதிமன்றக் காவலில் எடுத்து விசாரிக்க வேண்டும் என காவல்துறை தரப்பிலிருந்து மனுதாக்கல் செய்யப்பட்டிருக்கிறது. அது தொடர்பான விசாரணை நாளை நடைபெறும் எனக் கூறப்பட்டிருக்கிறது.

Junior Vikatan-ன் பிரத்யேக Whatsapp Group...

இணைவதற்கு இங்கே க்ளிக் செய்யவும்... https://tinyurl.com/2b963ppb

வணக்கம்,

BIG BREAKINGS முதல்... அரசியல், சமூகம், க்ரைம், சினிமா என அனைத்து ஏரியாக்களின் அசராத அப்டேட்ஸ், ஆழமான கட்டுரைகள்.

ஜூனியர் விகடன் இதழ் மற்றும் டிஜிட்டலில் கவனம் ஈர்க்கும் கட்டுரைகள் இங்கே உடனுக்குடன்... https://tinyurl.com/2b963ppb