"இதயத் துடிப்பைக் கொண்டு வர 45 நிமிடங்கள் போராடினோம்" - நானா படேகரைக் காப்பாற்ற முயன்ற டாக்டர்கள்

பாலிவுட் நடிகர் நானாபடேகர் இன்று அதிகாலையில் கோவாவில் உள்ள அவரது இல்லத்தில் மயங்கிய நிலையில் கிடந்தார். அவரை டாக்டர்கள் மருத்துவமனைக்குக் கொண்டு சென்று அவரது இதயத் துடிப்பை மீண்டும் கொண்டு வர போராடினர். ஆனால் முயற்சி பலனலிக்கவில்லை. அவர் உயிரிழந்துவிட்டார்.

அதிகாலையில் நானா படேகருக்குக் கடுமையான நெஞ்சு வலி ஏற்பட்டது. உடனே அவர் புனேயில் இருக்கும் தனது மகனுக்கு போன் செய்து பேசியுள்ளார். இதையடுத்து அவரது மகன் மருத்துவக் குழுவைத் தொடர்பு கொண்டு உடனே செல்லும்படி கேட்டுக்கொண்டார். அவர்கள் வந்தபோது நானாபடேகர் மயங்கிவிட்டார்.

அவர் மனிப்பால் மருத்துவமனைக்குக் கொண்டு செல்லப்பட்டார். அவருக்கு இறுதி நேரத்தில் சிகிச்சையளித்த டாக்டர் சேகர் சல்கர் கூறுகையில், "45 நிமிடங்கள் தொடர்ந்து அவரது இருதயத் துடிப்பைக் கொண்டு வர முயற்சி மேற்கொண்டோம். ஆனால் அவரை மீண்டும் உயிர்ப்பிக்க முடியவில்லை.

இது தொடர்பாக மருத்துவ-சட்ட ரீதியான வழக்கு (MLC) பதிவு செய்யப்பட்டுள்ளது. மேலும் பிரேதப் பரிசோதனையும் நடத்தப்படும்" என்று தெரிவித்தார்.

நானா படேகர் மறைவுக்கு பாலிவுட் இரங்கலும் அதிர்ச்சியும் தெரிவித்துள்ளது. புனேயில் இருந்து அவரது மகன் மல்ஹர் கோவாவிற்கு விரைந்துள்ளார்.

நானா படேகர் மறைவுக்கு கோவா முதல்வர் பிரமோத் சாவந்த் வெளியிட்டுள்ள இரங்கல் செய்தியில், ''இந்தியத் திரையுலகின் மிகச்சிறந்த நடிகர்களில் ஒருவராக மட்டுமல்லாமல், கோவாவுடன் ஆழமான பிணைப்பைக் கொண்டிருந்த நெருங்கிய நண்பராகவும், அர்ப்பணிப்புமிக்க சமூக ஆர்வலராகவும் திகழ்ந்தார்.

இந்தத் துயரத்தின் தருணத்தில் நான் நானா படேகர் குடும்பத்துடன் இருக்கிறேன். நான்கு நாள்களுக்கு முன்பு கோவாவில் நடந்த ஒரு நிகழ்ச்சியில் அவர் கலந்துகொண்டிருந்தார். நானும் அங்குச் செல்லவிருந்தேன், ஆனால் வேறு சில பணிகளின் காரணமாக என்னால் செல்ல முடியவில்லை," என்று சாவந்த் கூறினார்.

மத்திய அமைச்சர் நிதின் கட்கரி தனது எக்ஸ் தளப் பக்கத்தில் வெளியிட்டுள்ள இரங்கல் செய்தியில், ''இந்தியத் திரைப்பட உலகின் மூத்த நடிகர் நானா படேகர் மறைந்த செய்தி மிகுந்த அதிர்ச்சியையும் மனவேதனையையும் அளிக்கிறது. அவருக்கு எனது ஆழ்ந்த இரங்கலைத் தெரிவித்துக்கொள்கிறேன்.

நானாவும் நானும் மிகவும் நெருக்கமான நட்புறவைக் கொண்டிருந்தோம். மராத்தி மற்றும் இந்தித் திரைப்படங்கள் வாயிலாக, தனது சிறப்பான நடிப்பால் ஐந்து தசாப்தங்களுக்கும் மேலாக ரசனைமிக்க ரசிகர்களின் இதயங்களில் நானா படேகர் நீங்கா இடம் பிடித்திருந்தார்.

தனித்துவமான வசன உச்சரிப்பு பாணியால் பல திரைப்படக் கதாபாத்திரங்களை அவர் அழியாத்தன்மை கொண்டவையாக மாற்றியதுடன், தனக்கென ஒரு தனி அடையாளத்தையும் உருவாக்கிக்கொண்டார். அவரது மறைவு இந்தியத் திரைப்படத் துறைக்கு ஒரு பேரிழப்பாகும்.

தற்கொலை செய்துகொண்ட விவசாயிகளின் குடும்பங்களுக்கு அவர் நீட்டிய உதவிக்கரம் பல குடும்பங்களுக்கு ஒரு பெரும் ஆதரவாக அமைந்தது. நானா ஒரு சிறந்த கலைஞராகவும் நடிகராகவும் மட்டுமல்லாமல், சமூகத்தின் மீது மிகுந்த அக்கறை கொண்டவராகவும் திகழ்ந்தார். மறைந்த அவரது ஆன்மா சாந்தியடையட்டும்'' என்று பதிவிட்டுள்ளார்.

1951-ஆம் ஆண்டு ஜனவரி 1-ஆம் தேதி மகாராஷ்டிராவில் விஸ்வநாத் படேகர் என்ற பெயரில் பிறந்த நானா படேகர், 1978-ல் 'கமன்' திரைப்படத்தின் மூலம் இந்தித் திரையுலகில் அறிமுகமானார்.

'சலாம் பாம்பே' மற்றும் 'பரிந்தா' போன்ற திரைப்படங்கள் அவருக்குப் பெரும் திருப்புமுனையாக அமைந்தன. 'பரிந்தா' திரைப்படத்தில், நிழலுக தாதா அண்ணா சேத் கதாபாத்திரத்தில் அவர் வெளிப்படுத்திய தீவிரமான நடிப்பு, அவருக்குச் சிறந்த துணை நடிகருக்கான தேசியத் திரைப்பட விருதைப் பெற்றுத் தந்தது.