CJP-யின் தேசியக் கொடி போராட்டம்; மீண்டும் கைது செய்யப்பட்ட அபிஜித் தீப்கே; என்ன நடந்தது?

Oct 16, 2026 - 18:30

CJP-யின் தேசியக் கொடி போராட்டம்; மீண்டும் கைது செய்யப்பட்ட அபிஜித் தீப்கே; என்ன நடந்தது?

இந்தியத் தேர்தல் ஆணையத்தின் தலைமைத் தேர்தல் ஆணையர் ஞானேஷ் குமார் பதவி விலக வேண்டும் என இந்தியாக் கூட்டணி, கரப்பான்பூச்சி ஜனதா கட்சி அமைப்பினர் தொடர்ந்து டெல்லியில் போராட்டத்தை நடத்தி வருகின்றனர்.

இதன் ஒரு பகுதியாக டெல்லி ஜந்தர் மந்தரில் போராட்டம் நடத்தப்படும் எனக் கரப்பான்பூச்சி ஜனதா கட்சி நிறுவனர் அபிஜித் தீப்கே அறிவித்திருந்தார். இதனைத் தொடர்ந்து போராட வந்தவர்களை காவல்துறையினர் தடுத்து நிறுத்தி கைது செய்தனர். குறிப்பாக சிஜேபி நிறுவனர் அபிஜித் தீப்கே விமானத்தின் உள்ளே வைத்தே கைது செய்யப்பட்டார்.

இதனைத் தொடர்ந்து டெல்லி ஜந்தர் மந்தர் மைதானத்தில் இனி போராட அனுமதி கிடையாது என மத்திய உள்துறை அனுமதியுடன் டெல்லி காவல்துறை அறிவிப்பு வெளியிட்டது.

இதனை மீறி கரப்பான்பூச்சி ஜனதா கட்சித் தலைவர்கள் சௌரவ் தாஸ், அஷுதோஷ் ரங்கா, அஜிங்கியா ஷிண்டே உள்ளிட்டோர் நேற்று (அக்.14) தடையை மீறி ஜந்தர் மந்தருக்குள் நுழைந்து இந்தியக் கொடியைக் காண்பித்தனர்.

உடனடியாக அங்கே இருந்த காவல்துறையினர் அவர்களைக் கைது செய்து, நீதிமன்றத்தில் ஆஜர்ப்படுத்தப்பட்டு, ஐந்து நாள் நீதிமன்ற காவலில் சிறையில் அடைக்கப்பட்டுள்ளனர்.

இந்நிலையில் சௌரவ் தாஸ், அஷுதோஷ் ரங்கா, அஜிங்கியா ஷிண்டே ஆகியோருக்கு ஆதரவு தெரிவித்து டெல்லி மற்றும் மும்பையில் 'லேரா தோ திரங்கா' (மூவர்ணக் கொடியை ஏந்துவோம்) என்ற போராட்டத்தை சிஜேபி இன்று நடத்த இருந்தது.

அறிவிக்கப்பட்டப்படி தேசியக் கொடி போராட்டத்தில் பங்கேற்க வீட்டில் இருந்து புறப்பட்ட சிஜேபி நிறுவனர் அபிஜித் தீப்கேவை காவல்துறையினர் தடுத்து அழைத்துச் சென்றிருக்கின்றனர்.

இன்று காலை அபிஜித் தீப்கே செய்தியாளர்களைச் சந்தித்தப்போது , "இந்தப் போராட்டத்திற்கு முன்னதாக, டெல்லி காவல்துறை தன்னை எந்த நேரத்திலும் கைது செய்யக்கூடும்.

உளவுத்துறை அதிகாரிகள் தன்னைக் கண்காணித்து வருகின்றனர். எண்களற்ற வாகனங்கள் தன் பின்னால் வருகிறது. நாட்டில் தேசியக் கொடியை ஏந்துவதற்காக சிறை செல்ல நேரிட்டாலும் அதற்கு நான் தயாராகவே இருக்கிறேன்" என்று கூறியிருந்தார் என்பது குறிப்பிடத்தக்கது.