மனநலப் பிரச்னைகள் குறித்த விழிப்புணர்வை ஏற்படுத்த 7,000 கி.மீ பைக் பயணம்; பெண் ரைடரின் முன்னெடுப்பு!

இந்தியாவில் ஏழு பேரில் ஒருவருக்கு ஏதாவது ஒரு வகையான மனநலப் பிரச்னை இருப்பதாகக் கூறப்படும் நிலையில், மனநலச் சிகிச்சை பெறுவதில் சமூகத் தயக்கம், பாகுபாடு குறித்த அச்சம் உள்ளிட்டவை பெரும் தடைகளாக உள்ளன. அதேநேரம், மனநலச் சேவைகளுக்கான தேவைக்கும் கிடைக்கும் வசதிகளுக்கும் இடையே பெரிய இடைவெளி இருப்பதாகவும் அதில் தெரிவிக்கப்பட்டுள்ளது.

மனநலப் பிரச்னைகள் குறித்து விழிப்புணர்வு ஏற்படுத்துவதற்காக, ‘Beyond the Horizon: A Ride for Resilience’ என்ற பெயரில் 58 நாள் விழிப்புணர்வுப் பயணத்தை மதுரையைச் சேர்ந்த செஹர் ஹஷ்மி என்பவர் மேற்கொண்டு வருகிறார். ஆகஸ்ட் 20-ம் தேதி தொடங்கியுள்ள இந்தப் பயணம், இந்தியாவின் 50-க்கும் மேற்பட்ட நகரங்களைக் கடந்து அக்டோபர் 15-ம் தேதி நிறைவடையத் திட்டமிடப்பட்டுள்ளது.

இந்தப் பயணத்தின் முக்கிய நோக்கம், மனநலம் குறித்து பொதுமக்கள் குறிப்பாக இளைஞர்கள் மத்தியில் வெளிப்படையான உரையாடலை உருவாக்குவதும், தேவைப்படும் நேரத்தில் தகுந்த தொழில்முறை உதவியை நாடுவதற்கான விழிப்புணர்வை ஏற்படுத்துவதுமாகும்.

பள்ளிகள், கல்லூரிகள் மற்றும் இளைஞர்கள் மத்தியில் 100-க்கும் மேற்பட்ட விழிப்புணர்வு நிகழ்ச்சிகளை நடத்தவும் திட்டமிடப்பட்டுள்ளது. இதன்மூலம் சுமார் 12,000 முதல் 13,000 இளைஞர்களை சென்றடைய இலக்கு நிர்ணயிக்கப்பட்டுள்ளது.

மனநலத்துக்கான சிகிச்சை மற்றும் ஆதரவு குறித்த தகவல்கள் மட்டுமல்லாமல், நெருக்கடியான சூழ்நிலைகளை எவ்வாறு எதிர்கொள்வது, உதவி தேவைப்படும்போது எங்கு அணுகுவது போன்ற தகவல்களும் இந்தப் பயணத்தின் மூலம் பகிரப்படுகின்றன. மேலும், விழிப்புணர்வு சார்ந்த தகவல்கள் பல்வேறு இந்திய மொழிகளில் வழங்கப்பட உள்ளதாக தெரிவிக்கப்பட்டுள்ளது.

இந்தியாவின் மொத்த சுகாதார பட்ஜெட்டில் 1 சதவிகிதத்துக்கும் குறைவான தொகையே மனநலச் சேவைகளுக்காக ஒதுக்கப்படுவதாக நிகழ்வில் தெரிவிக்கப்பட்டது.

மேலும், மனநலச் சேவைகள் தேவைப்படுபவர்களில் 70 முதல் 92 சதவிகிதம் பேர் அவற்றைப் பெறுவதில்லை என்றும் குறிப்பிடப்பட்டுள்ளது.

7,000 கி.மீ சாலையை கடக்கும் இந்தப் பயணம், மனநலம் குறித்த சமூகத்தின் பார்வையில் மாற்றத்தை ஏற்படுத்தும் விழிப்புணர்வுப் பயணமாக தொடர்கிறது.