வாட்ஸ்அப்பில் ஒரு ‘Forward’… சட்டச் சிக்கலாகுமா? சட்டம் சொல்வது என்ன? - 2

“இந்த மெசேஜ் உண்மையா தெரியல... ஆனா நீங்களும் பாருங்க!”

இப்படி சொல்லி, ஒருவரைப் பற்றி வந்த தகவலை வாட்ஸ்அப்பில் பலருக்கு பகிர்வது சாதாரணமாகிவிட்டது.

ஆனா, அந்தத் தகவல் ஒருவருடைய நற்பெயரைக் கெடுக்கும் வகையில் இருந்தால்?

“நான் எழுதலையே... வந்ததைதானே பகிர்ந்தேன்!” என்று சொல்லி தப்பித்துவிட முடியுமா?

*‘அவதூறு’ என்றால் என்ன?*

ஒருவருடைய நற்பெயரைக் கெடுக்கும் வகையில் அவரைப் பற்றி குற்றச்சாட்டு அல்லது கருத்தை (imputation) சொற்கள், எழுத்து, அடையாளங்கள் அல்லது காட்சிப்படுத்தல்கள் மூலம் உருவாக்குவது அல்லது வெளியிடுவது, குறிப்பிட்ட சூழ்நிலைகளில் அவதூறாக (Defamation) அமையலாம்.

இதற்கான தற்போதைய குற்றவியல் சட்டப் பிரிவு, பாரதிய நியாய சன்ஹிதா, 2023 (BNS) – பிரிவு 356.

ஒருவருடைய நற்பெயருக்கு பாதிப்பு ஏற்படுத்த வேண்டும் என்ற நோக்கத்துடனோ (intention), அது அவருடைய நற்பெயருக்குப் பாதிப்பை ஏற்படுத்தும் என்று தெரிந்தோ (knowledge), அல்லது அவ்வாறு பாதிப்பு ஏற்படும் என்று நம்புவதற்கான காரணம் இருந்தோ (reason to believe), அவரைப் பற்றி குறிப்பிட்ட வகையில் தகவலை வெளியிடுவது அவதூறாக அமையக்கூடும்.

அவதூறு குற்றம் நிரூபிக்கப்பட்டால், BNS பிரிவு 356(2)-ன் கீழ் 2 ஆண்டுகள் வரை எளிய சிறைத்தண்டனை (Simple Imprisonment), அல்லது அபராதம், அல்லது இரண்டும், அல்லது சமூக சேவை தண்டனையாக விதிக்கப்படலாம்.

வாட்ஸ்அப்பில் அனுப்பினால் என்ன ஆகும்?

“வாட்ஸ்அப்பில்தானே போட்டேன்... நேரில் சொல்லலையே!” என்று நினைக்க வேண்டாம்.

ஒருவரைப் பற்றிய அவதூறான தகவல் அவரைத் தவிர வேறு நபருக்குத் தெரிவிக்கப்படுவது அல்லது சென்றடைவது முக்கியத்துவம் பெறுகிறது. எனவே, வாட்ஸ்அப் குரூப்பில் பகிர்வது, மற்றொருவருக்கு Forward செய்வது அல்லது ஸ்டேட்டஸாக வெளியிடுவது போன்ற செயல்களும், வழக்கின் உண்மைகள் மற்றும் சூழ்நிலைகளைப் பொறுத்து, தகவலை வெளியிடுவது (Publication) என்ற அம்சத்தின் கீழ் பரிசீலிக்கப்படலாம்.

வாட்ஸ்அப் மெசேஜ், வாட்ஸ்அப் குரூப், ஸ்டேட்டஸ் அல்லது சமூக வலைதளப் பதிவு என எந்த வழியில் தகவல் வெளியிடப்பட்டது என்பதும் முக்கியம். அதே நேரத்தில், அந்தத் தகவலின் தன்மை, சூழ்நிலை, அதைப் பகிர்ந்தவரின் நோக்கம், யாருக்கு அது பகிரப்பட்டது, அதனால் சம்பந்தப்பட்ட நபரின் நற்பெயருக்கு பாதிப்பு ஏற்பட்டிருக்குமா உள்ளிட்ட பல அம்சங்களும் கவனத்தில் கொள்ளப்படும்.

ஆனால், ஒருவரைப் பற்றி எதிர்மறையாகச் சொன்னாலே அது தானாகவே அவதூறாகிவிடாது.

அது சட்டத்தில் குறிப்பிடப்பட்டுள்ள அவதூறு வரையறைக்குள் வருகிறதா, ஏதேனும் விதிவிலக்கு பொருந்துகிறதா என்பதும் பார்க்கப்படும்.

“நான் Forward மட்டும்தான் செய்தேன்!”

ஒரு தகவலை நாமே உருவாக்கவில்லை என்பதற்காக மட்டும் சட்டப்பொறுப்பு தானாகவே நீங்கிவிடாது.

குறிப்பாக, ஒருவருடைய நற்பெயருக்கு பாதிப்பு ஏற்படுத்தக்கூடிய தகவலை அது உண்மையா என்பதைப் புரிந்துகொள்ளாமல் அல்லது அதன் தன்மையை அறிந்தும் மற்றவர்களிடம் பகிர்வது சட்டப் பிரச்னையை உருவாக்கக்கூடிய சூழ்நிலையாக இருக்கலாம்.

அதேநேரம், எல்லா Forward-களும் அவதூறு கிடையாது.

“Forward” செய்தது என்ற ஒரே காரணத்தால் மட்டும் ஒருவர் அவதூறு குற்றத்திற்கு தானாகவே பொறுப்பாகிவிட மாட்டார். Forward செய்யப்பட்ட தகவல் என்ன, அது யாரைப் பற்றியது, யாருக்கு பகிரப்பட்டது, அதைப் பகிர்ந்தவருக்கு அதன் தன்மை பற்றிய புரிதல் இருந்ததா, நற்பெயருக்கு பாதிப்பு ஏற்படுத்தும் நோக்கம் அல்லது அவ்வாறு பாதிப்பு ஏற்படும் என்று நம்புவதற்கான காரணம் இருந்ததா என்பன போன்ற அம்சங்கள் வழக்கின் சூழ்நிலைக்கு ஏற்ப பார்க்கப்படும்

BNS பிரிவு 356-ல், குறிப்பிட்ட சூழ்நிலைகளில் உண்மையான தகவலைப் பொது நன்மைக்காக வெளியிடுவது, பொது ஊழியரின் அதிகாரப்பூர்வ நடத்தை அல்லது பொதுப் பிரச்னை தொடர்பான ஒருவரின் நடத்தை குறித்து நல்லெண்ணத்துடன் கருத்து தெரிவிப்பது, அல்லது குற்றச்சாட்டு தொடர்பாக உரிய அதிகாரியிடம் நல்லெண்ணத்துடன் புகார் அளிப்பது போன்றவற்றுக்கு விதிவிலக்குகள் உள்ளன.

அதனால், “Forward செய்தாலே அவதூறு” என்றும் சொல்ல முடியாது.

“எனக்கு பேச்சுரிமை இருக்கே?”

ஆம். அரசியலமைப்புச் சட்டத்தின் சரத்து 19(1)(a)-ன் கீழ் பேச்சு மற்றும் கருத்துச் சுதந்திரம் பாதுகாக்கப்படுகிறது.

ஆனால், இந்த உரிமை வரம்பற்றது அல்ல.

Subramanian Swamy v. Union of India வழக்கில், ஒருவருடைய நற்பெயருக்கான உரிமை (Right to Reputation) அரசியலமைப்புச் சட்டத்தின் கீழ் பாதுகாக்கப்படும் முக்கியமான உரிமை என்பதை உச்ச நீதிமன்றம் வலியுறுத்தியது.

அதனால், “எனக்கு Speech-ல் Freedom இருக்கு” என்பதற்காக மற்றொருவரின் நற்பெயரைப் பாதிக்கும் எந்த அவதூறு தகவலையும் கட்டுப்பாடில்லாமல் வெளியிட முடியாது.

உங்களைப் பற்றி அவதூறு பரப்பிட்டாங்களா?

முதலில் பதற்றப்படாமல், அந்தப் பதிவு அல்லது செய்திக்கான ஆதாரங்களைப் பாதுகாத்துக்கொள்ளுங்கள்.

ஸ்கிரீன்ஷாட் (Screenshot), மெசேஜ், தேதி, நேரம், வாட்ஸ்அப் குரூப் விவரங்கள், ஸ்டேட்டஸ் அல்லது சமூக ஊடகப் பதிவுகள் போன்றவற்றை முடிந்தவரை பாதுகாத்து வையுங்கள்.

பின்னர், சம்பந்தப்பட்ட தகவலின் தன்மை மற்றும் சூழ்நிலையைப் பொறுத்து சட்ட ஆலோசனையைப் பெற்று உரிய நடவடிக்கையைத் தேர்வு செய்யலாம்.

குற்றவியல் அவதூறு தொடர்பான புகார் நடைமுறையில், பாரதிய நாகரிக் சுரக்ஷா சன்ஹிதா, 2023 (BNSS) – பிரிவு 222 முக்கியமானது. BNSS பிரிவு 222-ன் படி, பொதுவாக அவதூறு குற்றத்தை நீதிமன்றம் விசாரணைக்கு எடுத்துக்கொள்ள, அந்தக் குற்றத்தால் பாதிக்கப்பட்ட நபர் (person aggrieved) புகார் அளித்திருக்க வேண்டும். சில குறிப்பிட்ட சூழ்நிலைகளுக்கு சட்டத்தில் தனியான நடைமுறைகளும் உள்ளன.

ஒரு ‘Forward’... ஆனால் சட்டப் பிரச்னை பெரியதாக இருக்கலாம்!*

ஒரு ‘Forward’ செய்ய சில விநாடிகள்தான் ஆகும்.

ஆனால், அது ஒருவருடைய நற்பெயரைப் பாதிக்கும் வகையில் இருந்தால், அதன் சட்ட விளைவுகளை அவ்வளவு எளிதாகக் கடந்து செல்ல முடியாது.

அடுத்த முறை ஒரு தகவலை Forward செய்வதற்கு முன்...

“இது உண்மையா? இதை நான் ஏன் பகிர்கிறேன்? இதனால் மற்றொருவருக்கு பாதிப்பு ஏற்படுமா?” இதைப் பகிர்வதற்கு நியாயமான காரணம் இருக்கிறதா?

என்று ஒருமுறை யோசியுங்கள்.

ஒரு Click செய்யும் முன்... ஒரு முறை யோசிப்பது நல்லது!