ஆசியப் போட்டி: 44 ஆண்டுகளுக்குப் பிறகு இந்தியா வென்ற பதக்கம்; சாவன் பர்வால் சாதனை!

ஜப்பானின் நகோயாவில் நடைபெற்று வரும் 2026 ஆசியப் போட்டிகளில் இந்தியாவின் சாவன் பர்வால் ஆண்களுக்கான மாரத்தான் போட்டியில் வெள்ளிப் பதக்கம் வென்று சாதனை படைத்துள்ளார். 42.195 கி.மீ தொலைவை 2 மணி 11 நிமிடம் 37 விநாடிகளில் கடந்து அவர் இரண்டாவது இடத்தைப் பிடித்தார். இதன்மூலம் ஆசியப் போட்டி மாரத்தானில் இந்தியா 44 ஆண்டுகளுக்குப் பிறகு மீண்டும் பதக்கம் வென்றுள்ளது.

1982-ம் ஆண்டு டெல்லியில் நடைபெற்ற ஆசியப் போட்டிக்குப் பிறகு, ஆண்கள் மாரத்தானில் இந்தியாவுக்கு பதக்கம் கிடைக்கவில்லை. அந்த நீண்ட இடைவெளியை சாவன் பர்வால் தற்போது முடிவுக்குக் கொண்டு வந்துள்ளார்.

ஜப்பானின் இச்சிடகா யமஷிதா 2:10:49 நேரத்தில் தங்கப் பதக்கமும், சீனாவின் பெய்யோ ஃபெங் 2:12:13 நேரத்தில் வெண்கலப் பதக்கமும் வென்றனர்.

ஹிமாச்சலப் பிரதேசத்தின் மண்டி மாவட்டத்தில் உள்ள ராடா பாங்கர் கிராமத்தைச் சேர்ந்தவர் சாவன் பர்வால். சிறிய கிராமத்திலிருந்து தொடங்கிய இவரது ஓட்டப் பயணம், தற்போது ஆசியப் போட்டி மேடை வரை வந்திருக்கிறது.

சாவன் பர்வாலின் இந்த வெற்றியில் இன்னொரு சுவாரஸ்யமான பின்னணியும் இருக்கிறது. மாரத்தான் அவருடைய ஆரம்ப இலக்கே கிடையாது. பள்ளிப் பருவத்தில் தடகளப் போட்டிகளில் பங்கேற்கத் தொடங்கிய அவர், பின்னர் 5,000 மீட்டர் மற்றும் 10,000 மீட்டர் ஓட்டங்களில் கவனம் செலுத்தினார். 2019-ல் இந்திய ராணுவத்தில் சேர்ந்த பிறகு, தடகளத்தை ஒரு தொழில்முறை பாதையாக எடுத்துக்கொண்டார்.

2026 ஏப்ரலில் ராட்டர்டாம் மாரத்தானில் தனது முதல் போட்டி மாரத்தானிலேயே 2:11:58 நேரத்தில் ஓடி, 1978-ம் ஆண்டு சிவ்நாத் சிங் படைத்த 2:12:00 தேசிய சாதனையை முறியடித்திருந்தார். இப்போது அதைவிட வேகமாக ஓடி, ஆசியப் போட்டியிலும் இந்தியாவுக்கு பதக்கம் பெற்றுத் தந்துள்ளார்.