முதலைகள் நிறைந்த ஆற்றில் 25 கி.மீ நீச்சல் - 75 வயது பாட்டியின் உயிர் தப்பிப்பதற்கானப் போராட்டம்!

ஒடிசாவின் ஜாஜ்பூர் மாவட்டத்தைச் சேர்ந்தவர் 75 வயதான கேஷி தலாய்.

தன் குடும்பத்தினருடன் வசித்து வந்த இவர், சனிக்கிழமை இரவு வழக்கம்போல குடும்பத்தினர் அனைவரும் தூங்கிக் கொண்டிருந்த வேளையில், வீட்டின் அருகில் பாயும் பிராஹ்மணி நதிக்கரைப் பகுதிக்கு இயற்கை உபாதைக்காகச் சென்றுள்ளார்.

அப்போது பெய்த கனமழையால் நதியில் வெள்ளப்பெருக்கு ஏற்பட்டிருந்தது. எதிர்பாராதவிதமாக பாட்டியின் கால் சறுக்கி, கரைபுரண்டு ஓடிய பிராஹ்மணி நதியின் பெருவெள்ளத்தில் தூக்கி வீசப்பட்டார்.

பிராஹ்மணி நதிப் பகுதி என்பது ஆபத்தான முதலைகள் நிறைந்த பகுதி எனப் பெயர்பெற்றது. கரை ஓரங்களில் வசிக்கும் மக்கள் தங்களைப் பாதுகாத்துக் கொள்ள ஆற்றில் வலுவான தடுப்புகளை நிறுவும் அளவுக்கு அங்கு முதலைகளின் அச்சுறுத்தல் அதிகம்.

கடந்த ஐந்து ஆண்டுகளில் மட்டும் 20-க்கும் மேற்பட்ட மனிதர்களை அங்குள்ள முதலைகள் இரையாக்கியுள்ளன.

இருள் சூழ்ந்த அந்த நள்ளிரவில், ஆற்று வெள்ளத்தில் 12 மணி நேரத்திற்கும் மேலாகப் போராடி மிதந்தபடியே சென்றுள்ளார் கேஷி பாட்டி. மரணத்தின் விளிம்பிலும் தன்னம்பிக்கையைக் கைவிடாமல் நதியின் ஓட்டத்துடனே மிதந்து வந்துள்ளார்.

ஞாயிற்றுக்கிழமை காலை விடிந்தும் பாட்டியைக் காணாததால் அதிர்ச்சியடைந்த குடும்பத்தினரும் ஊர்மக்களும் தீவிரமாகத் தேடிவந்தனர்.

இந்நிலையில், ஜாஜ்பூர் மாவட்டத்திலிருந்து நதிவழியாக சுமார் 25 கி.மீ தொலையிலுள்ள கேந்திரபாரா மாவட்டத்தின் பாலிபட்னா கிராம மக்கள், ஆற்று வெள்ளத்தில் மூதாட்டி ஒருவர் உதவி கேட்டு கைகளை அசைப்பதைக் கண்டு விரைந்து செயல்பட்டு அவரை மீட்டனர்.

இதுகுறித்து பாட்டியின் மருமகன் ஆரண்யா தலாய் கூறுகையில், "காலை முழுவதும் பாட்டியைத் தேடிக் கொண்டிருந்தோம். அப்போது கேந்திரபாரா மாவட்டத்தில் உள்ள பட்டமுண்டை காவல் நிலையத்திலிருந்து எங்களுக்கு ஒரு அழைப்பு வந்தது. பாட்டி உயிருடன் மீட்கப்பட்ட செய்தி எங்களுக்குக் கிடைத்ததும் பேரமைதியும் நிம்மதியும் அடைந்தோம்" என உருக்கத்துடன் தெரிவித்தார்.

கொட்டும் மழையிலும், இருள் சூழ்ந்த நள்ளிரவிலும், முதலைகள் உலாவும் நதியில் 25 கி.மீ தூரம் மிதந்து வந்து உயிர் பிழைத்த கேஷி பாட்டியின் இந்தச் சம்பவம் தற்போது பேசுபொருள் ஆகி உள்ளது.