`அதே அரவணைப்பு, எளிமை...' - முதல்வர் விஜய்யை குடும்பத்துடன் சந்தித்த நடிகை சிம்ரன் நெகிழ்ச்சி

தமிழ்நாடு முதல்வராகப் பொறுப்பேற்றுள்ள விஜய்-யை, பிரபல நடிகை சிம்ரன் தனது குடும்பத்தினருடன் நேரில் சந்தித்து வாழ்த்து தெரிவித்துள்ளார். கடந்த காலங்களில் நடிகர் விஜய்யுடன் இணைந்து பல திரைப்படங்களில் கதாநாயகியாக நடித்து, வெள்ளித்திரையில் முத்திரை பதித்தவர் நடிகை சிம்ரன். பல ஆண்டுகளுக்குப் பிறகு இந்த நட்சத்திரக் கூட்டணி மீண்டும் சந்தித்துக் கொண்ட நிகழ்வு ரசிகர்களிடையே நெகிழ்ச்சியை ஏற்படுத்தியுள்ளது. இது குறித்து சிம்ரன் தனது எக்ஸ் பதிவில், ``பல ஆண்டுகளுக்கு முன்பு இணைந்து திரையைப் பகிர்ந்து கொண்டதற்குப் பிறகு, மதிப்பிற்குரிய தமிழக முதலமைச்சர் விஜய் அவர்களை எனது குடும்பத்தினருடன் சந்தித்ததில் பெருமகிழ்ச்சி அடைகிறேன்.

அன்று முதல் இன்று வரை எண்ணற்ற மக்களின் அன்பைப் பெறக் காரணமான அவருடைய அதே அரவணைப்பு, எளிமை மற்றும் நேர்மை இப்போதும் அவரிடம் துளியும் மாறாமல் அப்படியே இருக்கிறது. தமிழகத்தை முன்னேற்றப் பாதையில் கொண்டு செல்வதற்கான விஜய்யின் அர்ப்பணிப்பும், தொலைநோக்கு பார்வையும் எனக்கு மிகுந்த ஊக்கமளிக்கிறது. மேலும், தமிழகத்தை வளர்ச்சிப் பாதையில் வழிநடத்திச் செல்லவிருக்கும் முதலமைச்சர் விஜய்க்கு எனது மனமார்ந்த வாழ்த்துகளையும், எதிர்காலப் பணிகளுக்கான நல்வாழ்த்துகளையும் தெரிவித்துக்கொள்கிறேன்" எனக் குறிப்பிட்டிருக்கிறார்.