சமையலறையும் வகுப்பறையும்! - ஓர் ஆழமான வாழ்வியல் ஒப்பீடு

Aug 18, 2026 - 15:31

சமையலறையும் வகுப்பறையும்! - ஓர் ஆழமான வாழ்வியல் ஒப்பீடு

வாசகர்களை, எழுத்தாளர்களாக, பங்களிப்பாளர்களாக மாற்றும் விகடனின் ‘My Vikatan’ முன்னெடுப்பு இது. இந்தக் கட்டுரையில் இடம்பெற்றுள்ள கருத்துகள் அனைத்தும், கட்டுரையாளரின் தனிப்பட்ட கருத்துகள். விகடன் தளத்தின் கருத்துகள் அல்ல - ஆசிரியர்

மனிதனின் ஆரோக்கியமான ஆயுளுக்கும் சமூக அமைதிக்கும் அடித்தளமான சமையலறையும் வகுப்பறையும் புனிதமான வாழ்வியல் களங்களாகும். "சுத்தம் சோறு போடும்" என்ற பழமொழி உடலை வளர்க்கும் உணவும், அறிவை வளர்க்கும் கல்வியும் எவ்வளவு தூய்மையோடும் நல்எண்ணத்தோடும் பக்குவப்படுத்தப்பட வேண்டும் என்பதை உணர்த்துகிறது.

1. அஞ்சறைப் பெட்டி அறிவியலும் வகுப்பறையும்:

சமையலறையில் காய்கறிகளின் வாயு, பித்தக் கோளாறுகளைச் சரிசெய்ய அஞ்சறைப் பெட்டிப் பொருட்கள் உதவுவது போல, பாடப் புத்தகக் கல்வியோடு ஒழுக்கம், நேர்மை, பண்பாடு எனும் அஞ்சறைப் பெட்டி நெறிகளை ஆசிரியர் இணைத்துக் கற்பிப்பதே உண்மையான வாழ்வியல் கல்வியாகும். சமைக்கும் பாத்திரம் அசுத்தமாக இருந்தால் சத்தான உணவும் நஞ்சாவது போல, மாணவனின் மனம் எதிர்மறை எண்ணங்களுடன் இருந்தால் உலகத்தரம் வாய்ந்த பாடத்திட்டமும் எவ்விதப் பயனையும் தராது.

2. டிஜிட்டல் யுகமும் ஆசிரியரின் இடமும்:

இன்றைய டிஜிட்டல் யுகத்தில் இணையத்தில் (YouTube, AI, Google) சமையல் குறிப்புகளும் கல்வித் தகவல்களும் கொட்டிக்கிடக்கின்றன. ஆனால், அவை உணவக உணவைப் போல தற்காலிகத் தேவையை மட்டுமே பூர்த்தி செய்யும். தாயின் அன்பிற்கும் ஆசானின் ஆத்மார்த்தமான வழிகாட்டலுக்கும் அவை ஈடாக முடியாது. சுயநலமின்றி வழிகாட்டுவதாலேயே மாதா, பிதா, ஆசான் மூவரும் தெய்வ நிலைக்கு உயர்த்தப்படுகிறார்கள்.

3. அறமும் அன்பும் சார்ந்த கல்வி:

ஔவையின் "ஐயமிட்டு உண்" என்பது சமையலறையின் பகிர்ந்தளிக்கும் அறத்தையும், "ஓதுவது ஒழியேல்" என்பது ஆசிரியரின் இடைவிடாத கற்றலையும் குறிக்கிறது. ஆசிரியர்கள் பயத்தின் மூலம் பெறப்படும் தற்காலிக மரியாதையைத் தவிர்த்து, அன்பின் மூலம் மாணவர்களிடம் நிலையான சுயக்கட்டுப்பாட்டை உருவாக்க வேண்டும்.

4. கூட்டுப் பொறுப்பு:

கல்வி நிறுவனங்கள் வெறும் பாடத் திறன்களைத் திணிப்பதற்கு முன்பாக, அறம் சார்ந்த வாழ்வியல் கல்வியால் மாணவர்களின் மனதைத் தூய்மைப்படுத்த வேண்டும். ஆசிரியர் நல்வழிப்படுத்தும்போது பெற்றோர் கண்மூடித்தனமாக எதிர்ப்பைக் காட்டாமல் பக்கபலமாக நிற்க வேண்டும்.

முடிவுரை:

கல்வி நிறுவனம் என்பது லாபத்தை நோக்கமாகக் கொண்ட வணிக நிறுவனம் அல்ல; மனித வளத்தையும் நற்பண்புகளையும் செதுக்கும் உன்னதக் கூடமாகும். சமையலறையும் வகுப்பறையும் அன்பாலும் அறத்தாலும் இணையும் போது நம் நாட்டின் எதிர்காலம் பிரகாசிக்கும்.